El Gobernador del Bancu d’España fai apoloxía del terrorismu social

Milio Mariño

El branu nun quier apaecer pero nun hai día que nun apaezan dos o tres casos de corrupción y trés o cuatro sueldazos que nos dexen bizcos y col focicu torcíu como lu tuerce un pollín cuando ta de remonte. Y nun vayan creyer que faigo mención a esi xestu por Alicia Sánchez Camacho, que cobra 200.000 euros al añu y, pa esculpase, dixo qu'otros dirixentes del PP cobren eso y más. Yá lo sabíemos. Sabíemos que, pa ellos, nun rixen les lleis qu’imponen a los demás, nin la decencia nin na de na.

Tampoco rixe pa Luis María Linde, gobernador del Bancu d'España que cobra 13.550 euros al mes y acaba de proponer que s'esplore la posibilidá de contratar per debaxo del salariu mínimu que, anguaño, ta en 645,30 euros.

Tal como tan les coses, eso nun ye opinar ye facer apoloxía del terrorismu social. Mialma ye lo que faen los políticos, empresarios y banqueros que tan tol día cola matraca de qu'hai que baxar los sueldos y les pensiones, mientres ellos cobren una millonada. Había qu’esixi-yos que condenaren esa violencia, que nun ye distinta de la que facíen aquellos que toos sabemos.