Asturies: elecciones a cara o cruz o manfloritu l'últimu

Milio Mariño

Cascos acaba convocar elecciones y, anque non lo diga, paez como si quixera dicinos qu'hasta equí llegó, que los que nos equivocamos fuimos nós, los que nun supimos escoyer el partíu que podía igualo tou; esto ye: Foru.
¿Qué va pasar si nós, los probinos electores, nun almitimos l'erru y volvemos a les andaes de repitir el mesmu resultáu? Pos que se yo… ocúrreseme qu'igual lo echen a cara o cruz, o a manfloritu l'últimu.

El cura qu'exercitaba l'espíritu nun cruceru de luxu

Milio Mariño

Nun toi d'alcuerdo col tratamientu que tan dando los medios a esi cura que dixo que diba d'exercicios espirituales y resultó que yera ún de los pasaxeros del Costa Concordia.
Nun entiendo les rises nin que la xente chisgue los güeyos cuando fala d'esi asuntu. Tal paez que los exercicios espirituales solo pudieren faese nos montes del Tibet o na Cartuxa de Granada. L'espíritu, como los músculos, pue exercitase en cualesquier parte. Seique más y meyor nes discoteques y les piscines d'un cruceru de luxu qu'onde Cristu dio les tres voces.

Cinco millones y lo que te rondaré morena

Milio Mariño

Pesllada la formigonera lo que nos queda ye'l turismu y el campu, porque la industria, n'España, ye más escasa que les amapoles nel desiertu de El Gobi. Por eso da medrana que Rajoy y Company atesteren, como Georgie Dann, col mesmu cantar de siempre: formación, gabita a los entamadores y reforma llaboral. Equí lo que fai falta ye Blues del bonu, camudar el sistema granible y qu'inviertan los que tienen fierru.

Naufraxu total

Milio Mariño

Unu non escarmienta. Y mientres ve pasar un dia tres otru ensin entender cómo nin por qué crez l'entusiasmu soporta esa sonrrisa de culiebra profiden, ente lo macabro y lo celestial, que festexa la maravía alquímica de la inocencia de Camps.
Se que nun ye momentu, y tarrezo que nengún otru lo sía, d'esclariar la verdá. La xusticia y los xueces cada vez se paecen más al Cruceru Costa Concordia y al so capitán.

Fútbol pa difuntos

Milio Mariño

La xunta direutiva del Barcelona acaba anunciar que nun llateral del estadiu azulgrana, na parte baxa de la grada, acutaráse un requexu nel que los socios y aficionaos, podrán dexar les cenices, depués de muertos, al módicu preciu de 1.500, 2.000 o 4.000 euros, según seya'l buracu escoyíu.
Al paecer nun son los primeros, yá hai dellos equipos de fútbol qu'ufierten esi serviciu, pol que los culés piensen sacar hasta 6 millones d'euros.
Bona gana gastar perres en baldre. Si, polos menos yos ofrecieren un sitiu curiosu, pero nun requexu y embaxo la grada, nun se yo lo que van poder esfrutar los difuntos de los trunfos del so equipu. Cómo nun esfruten de oyíu…

Somos la risión de los fachas y los corruptos

Milio Mariño

Que los fascistes pidan la inhabilitación d'un xuez qu'entruga pol fascismu, seya Garzón o esa xueza que se pimpla y les arma mui gordes, namás pue dase nun país bananeru nel qu'un facha tira una gaspia de plátanu y castiguen al que la pisa, y lleva un focicazu, por fatu.
Ciertu que, como diz esi paisanu estranxeru, somos la risión, pero lo que más m'apulmona ye que los que s'escoyonen de nosotros nun son los que viven a 10.000 kilómetros, son los que viven equí y lleven escoyonándose dende va yá munchos años.

El día del Señor

Milio Mariño

Esti domingu, buxu y tristayu, lleo pola mañanina tempranu, que si unu se siente engañáu nun tien por qué preocupase nin tomalo a pechu, que nos engañen a toos. Nun ye consuelu. Nun val tampoco echái la culpa al Señor. Díxolo mui bien aquel poeta d'Uviéu: Mañana non sedrá lo que Dios quiera.
Igual tampoco lo que queramos nosotros pero ye más prestosu matar el tiempu intentándolo qu'amorrinar llamentándonos.

Indultos a bultu

Milio Mariño

Soi tan inorante, non me duel reconocelo, qu'inoro les razones poles qu'un Ministru de Xusticia indulta a un banqueru tramposu y a un futbolista condenáu a tres años y picu de cárcel por agresión sexual. Seguru que, nes dos decisiones, hai razones d'Estáu que les xustifiquen de sobra, por eso nun algamo a criticales. Alcuérdoles y póngoles xuntes, col aquello de que dalguién, más y meyor informáu, puea sacame d'esti alloriu y apurrime una rayadina de lluz.

El capitán Araña

Milio Mariño

Plasmé al oyír la conversación del Capitán del Cruceru coles autoridaes del puertu. Y, entovía plasmé más cuando supi qu'escapó del naufraxio en taxi. ¿Cómo, el Capitán pue escapar, d'un barcu a pique, en taxi ? Tamos llocos?
Yá nun ye pol mal que fexo ye qu'esti fantasma acaba frayame dalgo que llevaba dientro dende la infancia. Lo que m'enseñaren de neñu yera que'l Capitán d'un barcu non solo yera l'últimu en abandonalo sinón que na versión qu'a min me dieron non lo abandonaba nunca, si llegaba'l casu dexábase dir a pique col barcu. Non por heroísmu, por dignidá.
Quedame'l consuelu de qu'esti nun yera Capitán, yera'l direutor d'un hotel de playa

La mala Nota de Francia

Milio Mariño

La noticia de güei ye qu'a Francia quiten-y la Triple A. Y unu que va pa vieyu, o igual yá lu ye, alcuerda que'l nome sonába-y enforma pero non pola so rellación con dengún asuntu económico, sinón porque asina yera como llamaben a una banda parapolicial arxentina, d'estrema drecha, qu'allá pelos años setenta, foi tristemente famosa polos sos crímenes.
La coincidencia ye solu fonética, pero cuando unu oi esi nome, lloñe de pensar no que diz Moodys, piensa n'otres coses. Seique sía por vieyu, o porque unu siempre resabió de los que sacaben les meyores notes, pa min los sobresalientes en toles asignatures, suspendíen n'otres coses.

Cinismu a maza.

Milio Mariño

El cinismu estéticu d'esa sorrisa combaya de los soldaos que mexen enriba un calabre vien persiguiéndome dende que vi les imáxenes. Persíguenme, alcuérdoles y mánquenme, ensin que quiera nin puea evitalo.
Los matarifes ficieron lo que ficieron pero tien más culpa el que tira de la cadena del retrete. El que dio la urden y agora diz que va caye-yos el pelu a esos cuatro subnormales. Imaxino que tará pasando'l fin de selmana nuna mansión, cola cafarnaya que tien por vezu, y fairáse cruces de que los soldaos ficieren lo que siempre supo que facien, y taba bien fechu, mientres nun s'enterara naide.

Un toque astur pol Forru de los tolanos

Milio Mariño

Diz el Conserxe (1) de Cultura del Principáu que quier dai un toque astur al Festival de Cine de Xixón. Asina que'l próximu cartelu témome muncho que seya: Adiós Cordera, Rogelia, Pídele cuentas al rey y Yate Oyí.
Podíen dexalo como taba, que mialma taba per bien, y dai'l toque asturianu, pesllando cada función, con unos pinchos de cabrales, unos tortos de xabaril y unos frixuelos. Pero pa eso hai que saber y estos lo únicu que saben ye xoder.
(1) Ta bien escritu non m'enquivoqué. Marcos ye Conserxe, el Conseyeru, el mal conseyeru, ye l'otru, el de les ñarres de boxeador.

Lo que más falta nos fai ye un bon barrenderu.

Milio Mariño

Seya too verdá, o namás un pocu, lo d'esi Direutor d'Empleu que mandaba al xofer a comprar cocaína con dineru públicu, el casu ye que tenemos a dos Presidentes de Gobiernos Pequeñinos, un miembru de la Casa Real, un ministru y milenta cargos públicos que'l que nun ta sentáu nel bancu los acusaos ta en capiella de que lo sienten y lo xulguen por gochu.
Viendo como ta la cosa lo que más priesa nos corre ye facer llimpieza a fondu. Pero… ¿quién la fai, quién se pon a ello, si unos y otros tan enllordiaos, y tol mundu barre pa dientro?

Otra bronca de la drecha asturiana.

Milio Mariño

Como aveza a pasar nun cientu families, siempre por estes feches, paez ser que la drecha asturiana volvió a tener bronca agora por navidaes. El matrimoniu ta vistu que nun se lleva por más que quieran xuntalos. Nun se lleven el padre y la madre, nin tampoco los cuñaos nin los primos de Xixón.
La cosa tien mal arreglu. Más que separación ye divorciu. Caún pol so llau y buscando con quien xuntase pol aquello de que la soledá nun ye bona pa naide.
Y, a too esto, los fíos, como tamién aveza a pasar, entá nun saben con cuál de los dos van quedar.

Retoña la chulería y los malos modales.

Milio Mariño

Que nos suban los impuestos doi por fechu que non mos gusta un pimientu. Pero buenu, ye lo que votó la mayoría y habrá que cargar con ello y llevalo lo meyor que podamos. Agora, lo que nun merez naide, nin los sos votantes nin quien non los votamos, ye que lo faigan con chulería y amenazando.
Estu namás ye l'entamu, dixeron dellos ministros riyéndose a carril enlleno. L'entamu de qué, faltosos. Lleváis una selmana nel gobiernu y lo primeru que se vos ocurre ye dir de chulos y amenazanos.