Asturianos ya cazurros xuntos pola financiación autonómica

Milio Mariño
(Collaboración nel Programa de Radio Noche tras Noche de la RTPA)

El mi lio d'esta selmana ye a cuenta d'esa alianza d'Asturies con Castiella y Lleón pol aquello de la financiación autonómica. Alianza a la que podríen sumase otres Comunidaes que s'enfrenten al mesmu problema: El d’una financiación inxusta basada nun repartu nacíu d'unos alcuerdos nos que namás se tuvo en cuenta contentar a los que podíen garantizar la estabilidá del Gobiernu de Madrid.

Nesto nun hai diferencies, tantu los del PP como los del PSOE cedieron a les presiones de los vascos y, sobremanera, de los catalanes, que la so última fazaña foi que-yos reconocieren una partida de más de 230 millones d’euros, de financiación estra, pa desarrollar la difusión del catalán.

Menuda bicoca, 230 millones del ala, pa promocionar el catalán y cero patateru pal asturianu. Anque buenu, toi seguru que, pal asturianu, el nuestru Gobiernin nun pidió un ris, pero tráigolo a colación como exemplu de despropósitu de financiación autonómica.

Lo malu de tou esto ye que nun son, solo, los catalanes los que tiren del tetu. El sistema de conciertu especial aplicáu en Navarra y el País Vascu ye una reliquia histórica qu’entá se caltién. Nun esiste nada que se-y paeza en nengún otru país d’Europa. Son unos privilexos propios de la dómina feudal qu’atenten contra la cohesión de cualquier estáu.

Asina les coses, el gobiernu d'Asturies, quier aprovechar la revisión del sistema de financiación autonómica, pa plantegar que nun se pue caltener la situación que dicíamos antes. Y nun ye l’únicu: Castiella y Llión ya dixo que taba d’alcuerdo.

Castiella y Llión tamién apoyó la postura d’Asturies nes negociaciones previes a la reforma del sistema de financiación de 2008, una postura a la que se sumaron Galicia y Cantabria y, entós, llamaron el pauto del Noroeste.

Nun sé yo cómo verán Rajoy y Montoro esta alianza d’asturianos y cazurros pero pienso que deberíen tomala en serio porque dalgo paecíu foi lo que provocó la rebelión de Pelayo.

Pelayo llevantóse contra los moros a cuenta de los impuestos que pretendía recaudar Munuza, en nome del Califatu de Córdoba. Un pocu pa Córdoba y un plizcu pa él, pos ante los reproches que-y fexo Pelayo, camienten que Munuza xustificóse con esta frase: Quien recueye la miel tien drechu a chupase los deos.

Ehí queda eso, pero siguiendo colo d’agora, el Principáu nun reclama que s’eliminen dafechu los cupos vascu y navarru, reclama una reconsideración de los mesmos, porque na actualidá nun tan apurriendo, a la caxa común del Estáu, les cantidaes qu’apurrimos el restu.



El nuevu sistema debería ser un modelu pensáu pa tol país y toles Comunidaes por igual, y non un modelu a la carta p'atender les esixencies d’unos ya inorar les de los demás. Yá ta bien de privilexos. Por eso que me paez positivu que’l nuestru Gobiernin vaya alantre cola propuesta y cola alianza de los cazurros. Nun tamos falando del fueru ol güevu… Falamos de muncho más: del fueru, el güevu y los cuartos.

Visitar la catedral ye más caru que dios

Milio Mariño

El Mi lio d'esta selmana ye a cuenta de lo que va costar, a partir d'abril, visitar la catedral d'Uviéu: siete euros al que vaya solu o en pareya y seis al que vaya en grupu. De los pensionistes, los paraos y los neños nun dicen nada. Asina que, pa m’idea, nun hai esceiciones, van tener que pagar siete euros como tou quisque.

Cada vez queden menos coses gratis. Como diz un amigu mio, a Gratis va tiempu que lu metieron presu. Yá nin siquier podemos esfrutar d'un patrimoniu que ye de toos, y qu'amás restaurase con fondos públicos. Un patrimoniu que si queremos velo, empiecen cobrándonos un euru, como al descuidu, y naide diz nada, pol aquello de qu’un euru nun va a dengún sitiu, pero depués atopámosnos con una xubida como esta, na menos que del setecientos por cientu.

Paez imposible que dalguién puea xustificar una xubida asina, pero pa la ilesia nun hai imposibles, la preba ye que’l Dean dixo, en declaraciones a la prensa, que si xuben les entraes a siete euros ye pa «dignificar» el turismu n'Uviéu.

Diz el Dean que lo qu'hai agora, la entrada a un euru, ye una chambonada. Por eso la ponen más cara porque tienen l’enfotu de que’l nuevu preciu, va dignificar el turismu y facilitar una visita turística de calidá.

Nun sabía yo que'l turismu dignificase si los turistes paguen siete euros por visitar una ilesia. Claro que tampoco sabía que los turistes de mochila grande y cartera pequeña nun algamen dignidá bastante como pa visitar la catedral d'Uviéu.

Pero buenu, que pongan esi preciu por visitar la catedral, a mi paezme que pue ser mui beneficiosu pa los negocios d'hostelería, pos imaxino que van ser munchos los turistes qu’enantes de pagar siete euros, van sentase nuna terraza a tomar una caña o una botellina de sidra a la salú del obispu.

Nun creo que, a siete euros, vuelvan a repetir el númberu de visites del añu pasáu, que según dixeron foi, na menos, que d’ochenta y cuatro mil persones.

Menuda caxa, perres como borra… Eso debieron de pensar el dean, l'Arzobispu y el Cabildu, que de matemátiques igual van xustos pero como saben llatín abondo, seguru qu’echaron cuentes y calcularon que si lo qu'hasta agora costaba un euru lo poníen a siete, y manteníen el númberu de visites, pasaríen de recaudar 84.000 euros al añu a recaudar 588.000, casi cien millones de pesetes.

Cien millones, que lo mesmu suena mui fuerte dicir que son de dineru negru, pero naide sabe’l color que meyor-y cuadra, pos les entraes nun tán sometíes a nengún control, nun paguen IVA y nun tienen que rindir cuentes a Facienda nin a dengún organismu públicu del Estáu. Ye dineru llimpiu de polvu y paya, dineru del obispu que, si quier, nun tien que dar cuentes tampoco, nin a la propia ilesia. Con eso ta dicho tou… Buenu non… faltame dicir una cosa: Qué dios los perdone.

Colaboración Programa Noche tras Noche, RTPA

Les foles vagamundies

Milio Mariño

El comentariu d'esta selmana ye a cuenta de les cuatro alertes roxes, por grandes foles, que llevamos nestos primeros 36 díes del añu. Unes foles que nos nuesos puertos arrincaron muries y escolleres, fundieron barcos y arramplaron con cuantu había.

Les foles xigantes, que reciben el nome de foles vagamundies o foles monstruu, son foles que nun se correspuenden col estáu de la mar. Y esplícome. Estos díes tan rexistrándose foles de más de 11 metros, lo cuál entra dientro de l’altura que pue algamar una fola en casu de tormenta. Otra cosa son les foles de 20 metros, o más, como la qu’estos díes acaben de rexistrar cerca del cabu Peñes, foles que hasta va pocu los científicos aseguraben yeren tan escases que podíen apaecer una cada 10.000 años. Según los científicos, eses foles namás esistíen na imaxinación de los marineros, pero imáxenes de satélite, recientes, demostraron que los marineros nun cuntaben troles sinón que dicíen la verdá.

El 24 de xineru de 2009 la boya Augusto González de Linares, asitiada a 22 milles al norte de Santander rexistró una fola de 26,13 metros, equivalente a un edificiu de 8 plantes.

Cuesta-yos reconocelo pero, pa los científicos, inda ye un misteriu que, de secute, surda una fola, el doble de grande que'l restu. Asina que si, pa ellos, entá güei ye un misteriu, non m’estraña que, va unos sieglos, los navegantes creyeren qu’eses foles yeren cosa de los demonios marinos.

Lóxicu porque cuando nin la ciencia nin el sentíu son a esplicar dalgo, namás queda recurrir a lo sobrenatural. Lo malu que, nesti casu, según los teólogos, los demonios tarrecen metese na mar. Tienen-y tantu mieu que cuando tán obligaos a facer una travesía fáenla acomodaos nel cuerpu d'un humanu, sobremanera nel de les muyeres, eso dicía la Inquisición nel sieglu XVI.

Esplicaben aquellos teólogos que los demonios tarrecen metese na mar por dos razones: Primeru porque tan en caldia y denunciaríalos el fumu y, segundu, porque produciríase un chirríu igual que cuando metemos un tizón nun calderu con agua.

Nun sé a vosotros pero, a min, paécenme dos razones de pesu. Pero claro, si los científicos nun son a esplicar por qué se producen eses foles xigantes y los teólogos dicen que tampoco ye cosa del demoniu, l’únicu que nos queda ye la teoría de les catástrofes, de René Tom. Esa que vulgarmente se conoz como la gota que cuelma’l vasu. La mínima gota que fai que l'agua s’esborde o q’un edificiu se venga abaxo. Que vien ser, más o menos, lo que pasó nel barriu de Gamonal.

Pa min esi ye’l quiz. Si dalguién creyía que la mar diba aceutar la nueva Llei de Costes ensin protestar taba enquivocáu. La mar ponse gafa porque non la quier. De mou que yá ta tardando Rajoy en retirar esa llei. En cuantu que la retire apuesto a que la mar vuelve a quedar como un platu.

(Comentariu Selmanal nel programa de Radiu, de la RTPA, Noche tras Noche)