Mieu me da que ten engañándome

Milio Mariño

Nun sé por qué tengo l'enfotu de qu'eses bombes que los americanos dicen qu'atoparon nos aviones que veníen d'Inglaterra y de Dubai, y qu'al paecer taben llistes pa estopar, son una trola como El Capitoliu de grande.

Chocame que siempre atopen bombes, o den l'altu a dalgún terrorista, la viéspora de les elleiciones o cuando se barrunta que la popularidá del que manda esnidia picu abaxo camín del desastre.
Nun ye que me tenga por más llistu que naide, pero qué sé yo… tampoco tan fatu como pa pensar que les milenta concidencies, qu'hasta agora se dieron, son un petite del destín que tien querencia por eses feches.

Yá sé que nunca lo voi saber. Que malpenes sabemos na de lo que socede por eses alcantarielles que tienen tolos Estaos y que, polo vistu, son imprescindibles pa que puean gobernanos como ta mandáu.
Lo que me queda ye nun plasmar, ye dicir: Cuidáu, si queréis que trague, prepara-ylo un pocu meyor, redios. Nun creo que los terroristes vayan ser tan fatos como pa facer un paquetín, con Goma-2, y mandalo por avión como si fuere una tableta turrón.

El patiu de la escuela nun ye particular

Milio Mariño

Plasmo al ver como se tracamundia, pa min de forma interesada, eso de “regular los xuegos de los neños” nos patios de les escueles.
Plasmo de cómo s'escandalicen, en nome de la llibertá, los que tienen una idea mui particular de lo que nos fai llibres.
Dígolo porque ún de los valores de la sociedá democrática ye la participación responsable. Y eso, a min moldu de ver, ye lo que se trata de poner en prautica nel ámbitu de les escueles y nos patios escolares.
La llibertá y la responsabilidá nun son incompatibles. Daveres que non. Los neños son llibres y tienen drechu a esfrutar de la infancia como yos pete, eso nun creo que naide lo discuta. Pero l'exerciciu d'esa llibertá nun quita pa que los maestros los empobinen y los protexan. Nun pue ser que delles zunes nos resulten indiferentes y que'l patiu de la escuela seya como una cai trapacera na que se val cualquier cosa y rixe la llei del más fuerte.
La democracia, la ciudadanía, el respetu y los valores d'una sociedá nun sexista hai que procurar llevalos a tolos sitios, y a la escuela con más motivu.
Si nun ye eso, precisamente, lo que'l PSOE pretende cola propuesta, entós enquivocase. Enquivocase como enquivocaos tan los que, en nome de la llibertá, defenden que los neños, nel patiu la escuela, puen xugar a lo que-yos de pola gana y facer lo que-yos pete.

González-Sinde diz qu'un inteletual pue llamate mierda y lo que-y de pola gana

Milio Mariño

Entruguen-y a la ministra de cultura que-y paez la polémica que se preparó a propósitu de que Perez Reverte dixera de Moratinos que ye un perfechu mierda, y a González-Sinde nun se-y ocurre otra cosa que dicir que los inteletuales tienen llibertá pa opinar como yos de pola gana.
Si ministra, hasta ehí llegamos. Los inteletuales y too mariasantísima, campeona. Pero, cuidáu, ensin faltar a naide.

Tal como lo dixo la ministra ye pa entender que los inteletuales, por ser quién son, puen ponete pingando y, a ti, lo únicu que te queda ye aguantar el bastiáu.

Yera lo que nos faltaba, que la ministra de cultura diere llicencia a Reverte, y a tolos inteletuales, pa que se ciscaren en toos nosotros y hasta na madre que nos parió.

Ye preferible una babayada que dos de cinismu.

Milio Mariño

Toi plasmáu pola cantidá de tinta y los munchos regatos de cuspia que corrieron estos díes a propósitu d'una babayada del Alcalde de Valladolid, al que se-y ocurrió dicir lo qu'imaxinaba podía facer la Ministra de Sanidá colos llabios que tien.

La babayada foi de les que faen domina pero non me paez que fuere tantu como pa que, una selmana depués, entá sigan con esi cantar nos periódicos y los telediarios.

Yá sé que ta mal dicilo, y peor tratándose d'esti tema, pero mialma paez que tol mundu la cueye con papel de fumar. Valse dicir les mayores burraes en tolo que se quiera menos cuando anda pol medio una muyer. Valse pensar les aberraciones mas grandes que cueyan en mollera humana, pero nun se val diciles en públicu, so pena de puean aforcate na plaza mayor del pueblu.

Cuanta hipocresía hai pol mundu. Hai tanta que, puestos a escoyer, ye preferible la sinceridá al cinismu.

Xubilar a la ETA, enaína

Milio Mariño

A estes altures, nel sieglu XXI y nun país de la Unión Uropea, hai una reciella de terroristes que, entovía, tan pensando si dexen o nun dexen les armes. Piénsenlo abondo, nun sé que tendrán que pensar, diréis dellos. Yá, pero nun debe ser tan fácil, sobre manera pa los que lleven viviendo d'eso un porrón d'años y nun saben facer otra cosa. Claro que lo que manda caláu ye que, a la fin, va tener que ser l'Estáu, el que se faiga cargo d'ellos. Non mos va quedar más remediu que paga-yos la xubilación anticipada. Tien coyones la carga lleña pero si queremos qu'esto fine d'arréu, habrá que pesllar los güeyos, poner una pinza nes ñaples y facer de tripes celebru.

Ser el meyor nun tien ciencia, pue selo cualquiera

Milio Mariño

El Presidente Zapateru camudó, güei, el Gobiernu. Camudó nun sé si cuatro o cinco ministros.
De los que quitó, dixo que fueren toos buenísimos y de los nuevos diz que van ser, entovía, meyores.
El casu que, viendo lo que dicía Zapateru, alcordéme d'un maestru que tuvi y de cuando un día me dixo:
¡Oiga, nun quiera ser el meyor, conformése con ser buenu! Atienda lo que voi dicíi : El meyor pue selo cualquiera, pero ser buenu… ser buenu ye otra cosa.
Debí poner cara pamestu porque cuando acabó la clase mandóme quedar elli, xunto a él, y volvió a esplicámelo.
Toi por apostar que Zapateru debe tar como taba yo enantes de que m'esplicaren la diferencia ente ser el meyor y ser buenu. A les prebes me remito.

The parti de risa

Milio Mariño

La drecha de la drecha, l'ala dura de la gaviota, tien por zuna poner pingando al Gobiernu, tenga o nun tenga culpa.
Eso, hasta cierto puntu, ye normal, pero d'ehí a que ten tol tiempu, dai que te piego, llamando a Zapateru coyonazos por nun facer con Venezuela y Marruecos lo qu'ellos ficieron en Perexil, una de dos: o ye que lo dicen de coña, o que mialma son fatos del too. Fatos y mui peligrosos porque, al paecer, de tar ellos gobernando solventaríen lo de Marruecos a tiros y lo de Venezuela a bombazos.

Vaya peligru… Mamina que mieu. Mieu de ser la risión porque los americanos, y el mundu enteru, diben ponelos prietos a plizcos y a pataes nos todiellos.

Entá nun sabemos cómo nos quier vistir Rajoy

Milio Mariño

La drecha, y la drechona, atesteren y nun paren acusando al Gobiernu de facer una política enquivocada, pero'l Gobiernu nun anda mui lloñe de lo que fai Sarkozi en Francia. Tayada a los llogros sociales, estopa a los sindicatos y escorribanda a los emigrantes. Menos esto últimu lo otru ta faciéndolo Zapateru y Rajoy diz que nun ye por ehí la cosa.

Entós…¿ Qué ye lo que nos propón? ¿ Propón siguir la moda de París o la de Zara, que nun tien comparanza a peor? Quien sabe, igual nun-y valen denguna de les dos. Igual lo que ta pensando ye siguir la moda Agatha Ruiz de la Prada, la muyer del Kane de Llogroño, que con un trapu roxu y gualda lo mesmu fai una falda qu'un vistíu de llagarterana.