Los guardaespaldes muerren pola petrina

Milio Mariño

Güei domingo quiero cuntavos un cuentu que nun ye cuentu, ye una verdá como un templu. Dania Londoño pidió-y 800 dólares al guardaespaldes d'Obama que quería llevala a la cama y como'l puntu daba-y namás que 30, tuvieron griesca. A la fin cerraron el tratu en 200, pero la moza vengóse y cunto-yos, a los reporteros del New York Times, qu'unos díes enantes de la Cumal de les Amériques, celebrada en Cartaxena d'Indies, 11 miembros del Serviciu Secretu, movíos pa ocupase de la seguridá del presidente, y otros 10 militares destinaos de sofitu, fueron atendíos nel hotel onde s'agospiaben por 22 prostitutes. En USA ye un escandalo pero dígovos una cosa: quiero más que los policíes gasten los nuestros impuestos en putes que non que nos mayen a golpes.

Guarda pa mayu la lleña d'abril que nun sabes el tiempu que pue venir.

Milio Mariño

Eso diz el refrán, d'ehí, imaxino yo, que les autoridaes yá ten alvirtiendo que la cai ye del Gobiernu, y que'l gobiernu nun van dexar que naide, nin mozos nin vieyos, atroquen l'espaciu públicu pa facer protestes, burlla o rechifla, de tolo que nos vien enriba. Esperancina, y los de PP, anuncien estopa. Veremos ver lo que pasa porque, la lleña y la estopa, namás precisen d'un mistu pa prender la fogata. A lo meyor arde Troya y los qu'agora faluquen argutos igual chamusquen el culu y nun alcuentren pomada p'afalagar les enxives.

El TSJ d'Asturies enquivocase na sentencia pero acierta nel fallu.

Milio Mariño Como tolo que va mal pue dir a peor, el TSJ d'Asturies amestó otra paletadina más de carbón a la rodiella del Principáu. La sentencia bien ser como si, l'árbitru del partíu, dexara que Sergio Ramos volviera a tirar el penalti. Diz el Tribunal que la culpa tiénenla los eleutores non los elixíos. Nun queda otra que reconocelo: enquivóquense na sentencia pero acierten nel fallu.

Los Güelugaites

Milio Mariño Toi pensando en apuntame a la seción Senior del 15-M, lo que por ehí abaxo llamen los Yayoflautas y equí sedríen los Güelugaites. Dalgo habrá que facer pa valtiar los hachazos, que non retayos, que tamos sufriendo. Que tengan cuidáu con nosotros que podemos dar muncha guerra: sabemos l'oficiu, que mamamos de xovenzucos, y tenemos tol tiempu del mundu.

Petra y el pautu Pachu-Cherines

Milio Mariño Depués de pasar 15 díes viaxando por Andalucía, llego y atópome con una ciclogénesis esplosiva d'agarrate y tente tiesu. Na menos que con Petra y el pautu Pachu-Cherines, dos fenómenos de consecuencies semeyes. Dos ventolaes, al fin y al cabu, que dexarán al so pasu los estrozos de cuatro ramascos y la pingadura de los que pensaben siguir atechaos. La foto ye vieya pero podría valir pa illustrar los alcuentros del PPF

Marichalar como la cuñada.

Milio Mariño


Si la xusticia fuere igual pa toos, a Marichalar quitaríen-y la custodia yá mesmu. Padre divorciáu que-y dexa una escopeta al fíu, de 13 años, anden a tiros y el guaje acaba nel hospital con un pie afuracáu… Como poco va buscalo la Guardia Civil y tien que esplicar lo que fexo.
Non vos preocupéis que nun va pasar nada, esti como la cuñada, la que nun s'enteraba de los chanchullos y les cuentes en Suiza. A lo meyor igual lleven razón los que dicen que son toos fatos.

Güelpe d'Estáu

Milio Mariño
El llunes 9 d'abril consúmose'l Güelpe d'Estáu. Los ciudadanos de bien, la xente que nun fexo otra cosa que trabayar, pagar impuestos y recibir malpenes un plizcu que-y permitía vivir ensin luxu denguno pero con una migaya de dignidá, plasmó al ver qu'amás de los retayos que se vienen faciendo dende xineru, Rajoy esmesa 10.000 millones de sanidá y educación.
A la vista d'esti güelpe d'Estáu, al pueblu nun-y queda otra que coyer les armes, les armes que tien, que nun son otres que salir a la cai y rebelase a carta cabal. Dicíalo mio güelu pero vuelve a valir: Nun pasarán

Un Obispu que condena la homosexualidá y ampara la pederastia

Milio Mariño
La crisis, polo que yo tengo entendíu, nun esixe retayos en cuantu a lo muncho qu'avanzamos en tolerancia y respetu. Asina que nun sé a que vieno esa salida de tonu del Obispu d'Alcalá. Que, curiosamente, ye'l mesmu que dixo misa nel Valle los Caidos con una bandera franquista nel altar y ta pagándoi la vivienda al cura pederasta, José Martín, qu'abusó d'una neña. Tampoco se hasta cuando voi tener que sacrificame y renunciar a los mios drechos mientres los mios impuestos van parar a xente como esta.

Les dos Españes del PP

Milio Mariño

Diz el PP que cuando Sarkocy fala d'España quier dicir la España socialista, non la España d'agora, que ye l'auténtica y verdadera. Quier dicir que namás se ri de min y de dellos como yo, que tenémoslo bien merecíu por se como somos. Ya lo tan viendo, pa que llueu digan qu'acabóse aquello de les dos Españes. Según el PP sigue habiendo una España de chicha y ñabu, socialista, y otra que ganó la guerra y sigue en guerra colos ciudadanos d'a pie.