Volvemos al gallineru del Paraísu

Milio Mariño

Nos Oscar gano una película de cine mudu y el revival de la Dama de Fierro. Nos Goya una de cine negru, con policía malu y Xueza a lo Garzón femeninu. La vida, va tiempu que lo sabíemos, nun ye como nel cine pero, mialma, paez que vuelve averanos al blancu y negru y al entamu del sieglu pasáu. Volvemos al gallineru del Cinema Paraísu cola promesa que, d'equí a unos años, igual nos atroquen sitiu nun palcu.

A la mar foi por naranxes

Milio Mariño

Allégrome de que l'ayalga de La Mercedes, aquella fragata que foi a pique el 5 d'ochobre de 1804, frente a la costa de Faru, tea n'España. Mialma m'allegro pero tengo duldes de si esa ayalga nos pertenez o si somos igual de pirates que la compañía americana que la rescató de les agües.
Dígolo pola euforia de les autoridaes. Pienso que podemos sacar pechu pol pleitu pero non pola procedencia la plata.

A caballu, en coche o xubíu a la chepa del Rei

Milio Mariño

Hai munches formes d'entrar nun Xulgáu. Lo normal ye que l'imputáu, si nun padez del renaz, les rodiyes o los pies, lo faiga andando. Nun ye'l casu como tampoco lo ye'l domiciliu d'onde vien. Urdangarin nun sal de so casa pa dir al Xulgáu, sal del Palaciu de Marivent previu pasu pola Zarzuela. Xubióse a la chepa del Rei por más que Xuan Carlos quixera safase del muertu. Gran xugada del xenru y el suegru a tragar, con cara pamestu.

Lo de Laponia vien ser como apuntase a la División Azul

Milio Mariño

Güei, depués d'almorzar un cafetín con lleche y media docena galletes, colé pal parque, sentéme na corneya d'un bancu y diome por pensar que si por un aquello me saliera un choyu en Laponia lo mesmu escapaba p'alló berrando igual qu'un renu al rau d'una rena. Nunca lo pensara pero esti solín de febreru y les ocurrencies de la patronal, tan llogrando qu'en cuenta apuntame al Inserso vuelva a dame d'alta y m'apunte a lo que salga, quiciás al primer bombardéu.

C'est si bon güelina Bardot

Milio Mariño

Paez mentira Brigitte del alma. Non, non me digas nada, yá se que tienes 77 años y te gusten muncho los animales, pero qu'apoyes a esa animala de Marine Le Pen, duelme como una puñalada. Confieso que tengo soñáu munches vegaes contigo. Si los suaños fueron moyaos o ensuchos nun voi dicítelo, anque conociendo'l clima d'Asturies ye fácil imaxínalo. Qué pena. Agora, yá siempre voi arrastrar esi trauma, ye como si suañara con Pilar Primo de Rivera. Y, pa más aquello, güei ye 23 F.

Creyer no que nun se ve, la fe que vien de Valencia.

Milio Mariño

Confundir el continente col conteníu, entemecer churres con merines pa xustificar, llueu, por qué yos echaron el perru, tien la eficacia de quien s'aplica cataplasmes nos tolanos, mirando curar la picazón del gargüelu. Ye querer tapecer, a lo fato, que se metió la gamba hasta'l cuezo, llamándonos tuertos y ciegos.

Nun va haber paz pa los malvaos

Milio Mariño

La película del Gobiernu estrenóse'l pasáu mes de payares y la xente yá-y punxo título. Pue vese, amás de nes televisiones facistes y nos periódicos de dreches, nes empreses y nos servicios públicos. Notable ésitu, y estopa a dar por un tubu, nel so estrenu en Valencia y otres capitales onde'l públicu respondió como s'esperaba. Mariano, el so direutor, merecíu premiu Goya, que, como tol mundu sabe, yera sordu como una muria.

Pasiando al nuesu animal domésticu

Milio Mariño

Güei, un domingu buxu de febreru, milenta mil persones van sacar a pasiar la so rabia poles cais de munches ciudaes d'España. Camiento que valdrá de pocu. El Gobiernu va tomalo, pa mi idea, como quien saca a pasiar al perru.

Les cabres berren distintu equí qu'en Segovia

Milio Mariño

Nun estudiu que fixeron Elodie Briefer y Alan McElligott, de la Universidá Queen Mary, de Llondres, revelen que les cabres nun berren lo mesmo nuna rexón que n'otra, berren según la redolada onde viven y lleguen algamar un marcáu acentu que ye más importante cuando se faen mayores.
Venimos diciéndolo dende que se yo'l tiempu y naide nos fai casu. Les cabres, les persones, les vaques, los caballos, too bichu viviente, menos los pollinos, falen según onde vivan. A ver si, el Gobiernu del Principáu, agora que lo dicen estos ingleses, lo toma en cuenta y reconoz l'asturianu.

Houston, tenemos un problema

Milio Mariño

Tenémoslo enforma porque manda tolanos la carga lleña. Resulta que l'arzobispu d'Uviéu, esi que gasta barba, alcuérdase de ti y de la guapura encantada, Whitney quería. Mialma que nun ye broma. Discurrió animar a los fíeles convidándolos a que recen pol descansu eternu de la to alma. Tate sele cuquina que la influencia d'esti obispu ye tan poca que nin dios va tenelo en cuenta. Non te preocupes, seguru que vas siguir nel cielu de les estrelles, nesi cielu al que tantes vegaes t'averasti y, agora, atroques pa siempre.

Vuelvo a Arco: al elementu que salva l'espaciu ente dos muros.

Milio Mariño

Lo único qu'esti año gústame d'Arco ye la propuesta d'Isidoro Valcárcel Medina. Isidoro propón un Muséu de la Ruina. Esto ye, un muséu tan fráxil, tan inconsistente, que nin siquiera aceptare visitantes, a nun ser qu'a éstos nun-yos importare perecer baxu l'aliendu del desastre y la podredume.

Dos Sorayes como en Al Pelayu; qué tiempos

Milio Mariño

Nel Congresu de los Diputaos, güei cruciaron los sos puntos de vista los voceros de los partíos mayoritarios: d'un llau Soraya Saez y enfrente Soraya Rodríguez. Dos partíos y dos Sorayes, nome femenín d'orixe arabe que se refier a les Pléyades, eses estrelles que pertenecen al nuesu sistema solar pero que, en realidá, tán a 380 años lluz de nós.Atestero no del entamu: dos por unu como en Al Pelayu.

Arcu, col xugu y les fleches.

Milio Mariño

Caún cunta la feria según-y va nella. Los Empresarios, polo visto na tele, tan que s'escoyonen de risa col mercáu, la feria, del trabayu. Na otra feria, na del arte, trunfa Always Franco, una figura de Pachu en poliéster metía nun frigoríficu decoráu col diseñu de Coca-Cola.
Diz l'autor que Franco sigue siendo noticia, qu'entá nun desapaeció pol sumideru de la democracia. Vaya güeyu, vaya finu que salió esti artista.

Olvidu (nun ye por Alaska, ye por Rajoy)

Milio Mariño

El voceru parlamentariu del PP, Alfonso Alonso, dixo, ayeri mesmu, que'l ritmu de trabayu del Gobiernu ye tan intensu que selmana a selmana escaézse-yos lo que fixeron la selmana anterior.
Mialma lo creo. Son tan olvidadizos que Rajoy nun s'alcuerda que cuando la reforma llaboral de Zapatero punxo'l berru nel cielu diciendo que'l problema económicu d'España nun se solucionaba col abaratamientu del despidu.

La nueva xeometría de Grecia

Milio Mariño

Depués de muncho dai vueltes Pitágoras aceutó tar d'alcuerdo colo que-y mandó dicir Nietzsche, que'l cuadráu de la hipotenusa ye abondu más llargu que la suma de los catetos.
Aceutada la teoría queda echar númberos pero tolos nicios apunten a que nun van sali-yos les cuentes. Ye seguru que'l triangulo nun va ser reuto nin, aínda menos, equilláteru. Ellos, al paecer, confórmense con que-yos salga escalenu pero, viendo como tan les coses, lo mesmu, en llugar de triángulo, aperien un tricorniu semeyu al de Teyeru, naquel mes de febreru, fai agora 30 años.

Enrique, (Tienru)

Milio Mariño

Anuncien la publicación de les obres completes d'Enrique Tierno Galvan, l'home qu'inventó'l bandu municipal como xenero lliterariu y aceptó que lo llamaren el vieyu profesor a pesar de que, cuando, con 64 años, ganó les elecciones a l'alcaldía de Madrid, dixo: Ganemos los mozos.
Tuvi la suerte de conocelo y la pena d'asistir al so entierru. Teníalo casi escaecíu. La mio memoria sabrá por qué. Como él mesmu escribió: Naide ta d'alcuerdu consigo mesmu, naide. L'alcuerdu absolutu con unu mesmu equival a la necedá y la babayada.

Megapixeles pa fotografiar lo que pienses

Milio Mariño

Nun fui, nin creo que vaya a ser, oxetivu de los fotógrafos. Soi tan vieyu que les primeres semeyes de carné fíceles en foto minutu: paecío al fotomatón pero con paisanu de carne y güesu, ensin chabolu de plásticu. Digo esto porque ayeri presentó Nikon la so nueva cámara fotográfica, una reflex de… ¡¡ 36 megapixeles !!
Seguru que van llograr lo qu'andaben buscando: fotografiar les idees. Con esa resolución apaecerás, como siempre, con cara de plasmu, pero nun van tener duldes de si foi pol flax o pol sustu: van saber si yes, o nun yes, megatontu.

Tápies, descanse en paz

Milio Mariño

Los periódicos traen güei la noticia de que morrió Antonio Tápies, un pintor mundialmente reconocíu que nunca me gustó. Digo esto non polo que pueda suponer la mio opinión, que yá se que ye nada, sinón por si pudiere constituyir dalgún méritu facer pública confesión de qu'unu tien los sos gustos y nun tarrez quedar en ridículu, por incultu, cuando s'alloña de lo establecío pola autoridá cultural

Si sal con barba San Antón y si non La Purísima

Milio Mariño

Un cura gallegu encargó-y a un pintor de brocha gorda que pintare un mural nel picorotu la ilesia. Cuando pasaron unos díes, el cura foi ver como diba la cosa y al atopase con un llurdiu borrosu, que non se paecía a nada, entrugo-y que qué personaxe taba pintando.
El pintor encoyóse de costazos y dixo con un biecu atristayáu: Mire señor cura, si sal con barba San Antón y si non La Purísima.
Esta hestoria socedió muncho enantes de que se convocare'l Congresu del PSOE en Sevilla.

Primer vienres del llocu febreru.

Milio Mariño

El nuevu Fiscal Xeneral, puestu pol PP, nun va recurrir l'absolución de Costa y Camps. El xuez imputa, por apropiación indebía, a Díaz Ferran, expresidente de la CEOE. De Guindos va dar a los Bancos 50.000 millones d'euros pa que sanien pérdides y solventen el fiascu inmobiliariu. Los Notarios entamen a dar fe y yá faen de cura párrocu. Y mientres tou esto asocede la fola de fríu más fría del sieglu envolubra España…
Menos mal que, a la fin, güei ye vienres, compañeros…

Suañé cola muyerina de la tele

Milio Mariño

Esta nueche pasada tuvi un suañu que me dexo ablucáu. Suañé qu'una vieyina presentábase ante l'Altu Tribunal pa denunciar qu'a la so madre la mataren diba 75 años cuando ella yera pequeña. Falaba con voz fonda, dicía que pidir xusticia quiciás fuere la razón que, en tou esi tiempu, la tornara de suicidase animándola a siguir viviendo. Nun-y dieron respuesta, los chimpances vistíos de prietu, que tenia enfrente, secudíen la mollera como quien tenta axorizar les mosques de la mierda y nun se-y arregla.