Si rodare’l dineru acabábense les miseries

Milio Mariño

A un pueblín pequeñu, nel que tola xente debía perres y vivía a base de creitos, llegó millonariu dispuestu a pasar unos díes. Namás llegar empobinó pal hotel qu’había, pidió una habitación, punxo 100 euros enriba del mostrador y foise a ver les habitaciones.

El xefe del hotel garró'l billete y salió corriendo a pagar lo que-y debía al carniceru. Ésti coyó'l billete y corrió a pagar lo que-y debía al criador de gochos. El criador de gochos foi como un tiru y pago-y al molineru. El dueñu del molín coyó'l billete y foi volando a liquidar con María, la prostituta a la que diba tiempu que nun pagaba y amenaciáralu con nun dai más servicios a creitu.

La prostituta salió pal hotel, onde avezaba a llevar los clientes, punxo'l billete nel mostrador y dixo que’l so pufu quedaba saldáu. Nesi momentu baxó'l millonariu, qu'acaba d'echar una güeyada a les habitaciones, camentó que nun-y gustaba nenguna, coyó'l billete y foise.

Naide ganó un centavu, pero agora tol pueblu vive ensin deudes y mira al futuru con enfotu.

La crisis y los retayos tamién lleguen al pene

Milio Mariño

La Sociedá Americana de Pediatría, nun artículu publicáu na so revista Pediatrics, la biblia d'esta especialidá, afirma que, anque les ventayes nun son abondes pa proponer la circuncisión xeneral de tolos neños, dicha práutica ye bien recomendable por razones de salú y d'hixene.

El nomáu artículu ta provocando una polémica mundial ente partidarios y detractores. Hai xente que diz que la naturaleza tien de siguir el so cursu, que circuncidar a un neñu ye una agresión intolerable, mientres otros venlo bien y compárenlo con vacunase.

La polémica inclúi otres apreciaciones a tener en cuenta, como que los circuncidaos pierden el 30% de sensibilidá o que, anque'l pene nun aumenta de tamañu, si lo paez por efeutu visual y por una meyora sustancial de la so estética.

Ser de dereches o d'esquierdes, al paecer, ta nos xenes

Milio Mariño

Un estudiu de la Universidá de Sydney, publicáu esta selmana en delles revistes científiques, diz que la xenética inflúi nes distintes postures de les persones frente a temes como'l desempléu, los problemes sociales, l'albuertu o la pena de muerte.

Según dichu estudiu, analizando ciertos xenes del cuerpu humanu, los científicos pueden predicir, bien llueu, aspeutos futuros de la ideoloxía política d'una persona. Quier dicise que yá dende neñu podrá sabese si sedrás d’esquierdes o de dereches.

Soi bastante escépticu al respeutive d'estos estudios. Va tiempu lleí otru estudiu, de nun alcuerdo qué universidá, nel qu'aseguraben que los noctámbulos, ateos y miopes son más intelixentes que’l restu la xente.

Atestero en que soi bien escépticu pero con esti segundu estudiu nun pueo tar más d'alcuerdu. Pa min qu’acierten.

Un maltratador nun pue ser, nunca, un bon padre.

Milio Mariño

L'impactu d'una noticia como la de que los güesos xamuscaos, topaos fai 10 meses na finca Las Quemadillas, pueden ser de Ruth y José, lo primero que nos xenera ye una sensación d'incredulidá. Un padre nun mata a los sos fíos, dicimos glayando y dando por zarrada la valoración de lo asocedío. Tien que tratase d'un llocu, de daquién que tien totalmente alteriaes les sos facultaes mentales.

La realidá, cruda y fría, demuéstranos que nun ye asina. Nos últimos años más de 10 menores fueron asesinaos polos sos padres como parte d'una situación de violencia de xéneru.

Según una Macroencuesta, realizada pol Ministeriu d'Igualdá nel 2011, n'España hai 600.000 maltratadores. Y nun ye ciertu eso qu’oyimos dacuando en vez, qu'un maltratador pue ser un bon padre, denguno lo ye y dalgunos puen acabar, inclusu, cola vida de les sos muyeres y fíos.

Tendríemos que tenelo bien presente, asina naide, nin nós, nin la policía nin les autoridaes fadríamos les entrugues, ensin respuesta, que facemos, agora, cuando nos enteramos de casos como esti que nos trescala.

La restauración de Rajoy ye peor que la del Hecce Homo de Borja

Milio Mariño

La importancia d’una noticia nun depende, siempre, del fechu en sí, delles veces intervienen otros factores que son difíciles d’esplicar. Por eso que, ensin pretender facer un ensayu –dios me llibre- sobre’l fechu noticiosu, pongo enriba la mesa la diferencia de tratu de dos socesos nos que’l resultáu bien ser paecíu, pero con menos repercusión nel de consecuencies más graves.

La restauración que, dende fai 8 meses, fexo Rajoy sobre la imaxen d’España ye igual, o inclusu peor, que la que nos tan enseñando de l’anciana Cecilia Giménez sobre’l Hecce Homo del monasteriu de Borja.

Perembargu, llama l'atención que'l autor del cristu que padecemos nun suscitare nin nin la metá del escarniu que ta padeciendo la vieyina, nin, al paecer, van tomase medies pa qu’España vuelva recuperar l’aspeutu que tenía enantes de que’l incautu gallegu consumara la chapuza que ta convertiéndonos nel faime reyir d’Europa.

Lo del esclavu llibre ye un inventu coyonudu

Milio Mariño

Vivimos nuna sociedá qu’asitia’l consumu percima de cualquier escala de valores y na que cualquier ser vivu, oxetu, productu, idea, o sentimientu pue ser comercializáu. Atropaos por esti sistema, fuimos perdiendo la identidá, la participación na vida pública y la capacidá de control sobre’l nuestru destín hasta convertinos nuna reciella obediente qu’aceuta too ensin rechistar.

Consentimos que nos estafen y nos esploten d’una forma que llamen llegal pero si lo pensamos un pocu paez cosa de llocos.

Vamos poner, namás, unos pocos exemplos. Pensái no que ye la zona azul. Que nos cobren por aparcar na cai, manda carallo, Pagar porque naide se ponga delantre la entrada y non te dexe entrar en to casa, el vadu, tampoco tien esperdiciu. Pagar por circular col to coche pola via pública, impuestu de circulación, nun ye mocu de pavu. Pagar un impuestu, l'IVA, por comprar artículos imprescindibles pa comer o vistite, qué queréis que vos diga. Y asina podíemos dir nomando impuestos y tases que s’alloñen de lo sensatu y s’averen, cada vez más, a lo que nun tien sentíu.

Non se m’algama hasta cuando vamos dexar que nos traten asina, pero si nun ye agora sedrá dientro d’un pocu que tendremos que rebelanos pan un llegar a lo que casi tamos llegando, a ser esclavos.

Una güela fixo un Cristu con tola bona fe del mundu.

Milio Mariño

Nuna de les parés de la ilesia del Santuariu de la Misericordia de Borja, un pueblu aragonés de 5.000 habitantes, había un Ecce Homo pintáu, a finales del sieglu XIX, por Elías García Martínez, un destacáu pintor y profesor de Bellas Artes.

La pintura taba en mala traza, deteriorárase pol mugor y el pasu del tiempu. El casu qu'una vecina del pueblu, de 80 años, decidió restaurala, ensin dicir nada a naide, y el pasáu mes de xunetu entró na ilesia y tuvo dellos díes brocha en mano hasta que remató'l trabayu, col resultáu que podéis ver, na semeya que s'aporta enrriba d'esta renglera.

Cuando se descubrió’l pastel, agora nel mes d’agostu, el Conceyu encargó, a un profesional, un informe sobre los daños causaos y la pintura, al paecer, podrá recuperase, anque namás en parte, pero la nueva restauración va costar munchu y quiciabes nun puedan acometela, de mou que nun se sabe si lo que fixo la vieya quedará asina pa siempre.

En sofitu a les castañeres de Xixón

Milio Mariño

Los aviespaos políticos de Foru, nel Conceyu de Xixón, afayaron que vender castañes asaes, na cai, supón un codalosu negociu qu'apurre pingues beneficios y la posibilidá de que los sos promotores safen impuestos.

Implacables cola llei, los negocios duldosos y los chanchullos, los rexidores de Foru esixeron a les seis castañeres que, dende fai 28 años, exercen en Xixón, un aval bancariu de 1.000 euros, que se dean d'alta como autónomes y coticen a la Seguridá Social, un seguru de responsabilidá civil y una meyora sustancial na estética de les casetes onde asen les castañes, a lo cuál hai que sumar 150 euros de la solicitú d'apertura y 280 euros, que yá veníen pagando, de llicencia.

En vista de les esixencies municipales, les castañeres de Xixón salieron a la cai pa esplicar la so situación y recoyer firmes nel so sofitu. Un sofitu que, no que pueda valir, bríndo-yos dende equí y espero que vosotros, los que de cutiu lleéis y comentáis estes notes, yos brindéis tamién.

¿Volveremos al autoestop?

Milio Mariño

Facer autoestop, facer deu, yera una práctica bastante común nos mios tiempos de mocedá, allá pelos años setenta. Pero aquella práctica foi perdiéndose hasta'l puntu de que facía que sé yo'l tiempu que nun vía a naide al pie de la carretera col puñu zarráu y el pulgar picu arriba.

Ayer llevé una sorpresa. Vi a un chaval faciendo deu y llamenté dir en sentíu contrariu. Foi como si sufriere una apaición, como si nun minutu me pasaren pola cabeza los mios viaxes en autoestop y a tolos que yo llevara cuando tuvi coche, que foi bien llueu pos mirái si soi vieyu qu'alcuérdome d'aparcar na cai Uria.

¿Taremos volviendo atrás nel tiempu? ¿Volverá l'autoestop como mediu de tresporte? Nun me lo toméis en cuenta pero ayer mialma llevé un allegrón cuando vi al rapaz aquel, faciendo deu al pie de la carretera.

Periodistes que cobren como peones

Milio Mariño

Toos tamos al tantu de los sueldos que, n’España, paguen a la clase de tropa. De toles maneres, como entovía hai oficios de los que, quiciabes, tenemos una idea equivocada paezme que bien al casu camentavos esti datu.

Según l'últimu Conveniu de la Prensa Diaria los redactores tienen de cobrar, como mínimu, 1.400 euros al mes pero la realidá ye que los nuevos que contraten cobren ente 800 y 600 euros, les collaboraciones que se pagaben a 100 euros páguense a 60 y l'axencia estatal de noticies EFE, acaba de rematala diciendo que, a los collaboradores rexonales, va pagayos a razón de 6 euros por pieza, (por información) una cantidá que n'ocasiones ye inferior a lo que'l periodista invierte en llamaes de teléfonu o tresporte, gastos que paga del so bolsillu.

La FAPE (Federación d'Asociaciones de Periodistes d'España) colgó un comunicáu na so páxina web nel que manifiesta que ye una verdadera humildación qu'una empresa de titularidá pública, como EFE, esplote, asina, a la xente y contribuya al deterioru del periodismu como serviciu públicu.

Lo de trabayar dormiendo, suena a sonám-bulo

Milio Mariño

Los periódicos dan cuenta, estos díes, del casu Lee Hadwin, un galés de 36 años que trabaya d'enfermeru y mientres duerme ye capaz de pintar un cuadru, escribir poesía, o cocinar dos güevos fritos. Un casu únicu yá qu'espierto nun ye capaz de faer lo que fai dormíu.

Pa demostrar que nun hai trucu, Lee sometióse a delles pruebes na famosa clínica del suañu en Edimburgo. Y la resultancia, según cuenta'l sonámbulu, ye que'l cuerpu permanez despiertu mientres la mente ta dormía.

Tolos branos por estes feches, asoceden coses estrañes. Llámame l'atención que, la d'anguaño, sía que podemos siguir trabayando, o inclusive faer arte, mientres dormimos.

Yera lo que nos faltaba pero inda hai esperanza porque si, como diz Hadwin, la mente ta dormida y tou lo faemos col cuerpu, ye bien probable que nos salga como'l culu.

Endelgacen tolo qu’atropen

Milio Mariño

La mania de querer endelgazalo too nun conoz llende nin galga, atrévese inclusu con clásicos como Rubens. Ehí ta Anna Giordano, poeta, artista plástica y estudiante d'epistomoloxía de la filosofia lóxica, qu'afita que si Rubens pintare, güei, les Tres Gracies, estes diben ser bien diferentes de les rellenines de carne que tantu nos presten.

Pa demostralo non se-y ocurrió otra cosa que dayos unos brochazos de Photoshop a dellos cuadros. El resultáu podéis velo equí a la vera.

Nun sé lo que pensaréis vosotros pero, pa min, que pierden tola gracia tal como les dexa l'artista italiana.

Ta vistu que si Venus, diosa del amor y la guapura, cayera en manes d’estos que manden agora nun se llibraba la probe d'una dieta de fame que diba dexala nos güesos. Tantu más yos dá. Ya lo dixo Rajoy: Feliz branu a quien puea… Y, el que non, que se xoda.

Acebes tien un sueldu enerxéticu, cobra 72.500 euros, al mes, n'Iberdrola

Milio Mariño

Nun ye verdá que ser políticu sía un choyu, el exministro d'Interior, Ángel Acebes, cobra, al mes, n'Iberdrola la mesma retribución que percibía na so etapa de diputáu al cabu d'un añu.

Acebes lleva dende'l 24 d'abril n'Iberdrola, empresa a la que se treslladó en saliendo del conseyu de BFA, matriz de Bankia, solu dos selmanes primero que ésta tuviera que ser intervenida pol Estáu.

Acebes ye unu de los conseyeros meyor pagos, asignóse-y la mesma retribución qu'a otros miembros del so conseyu. Nos meses de mayu y xunu, cobró un total de 145.000 euros y el trabayu foi asistir a dos conseyos d'alministración y una xunta xeneral d'accionistes.

Nun m'importaría, pa nada, el sueldu de Acebes si nun fuera que me lo carguen nel recibu de la lluz tolos meses.

Lo de Gordillo nel supermercáu ye más folklóricu qu’eficaz.

Milio Mariño

Cuando'l robot Curiosity aterrizaba en Marte, Sánchez Gordillo, alcalde de Marinaleda y diputáu de IU, entró nun supermercáu, con seis collacios, y enllenó dellos carros de comida pa repartir ente la xente.

La Visa Verbal que presentaron en caxa foi: Hai xente que pasa fame y lladrones de guante blancu que roben pola patilla.

Protestar, ante lo que non mos gusta, siempre me paeció una reacción mui sana, pero la situación riquier protestes más eficaces. Lo que fixo Gordillo y los sos collacios sirve-yos p'apaecer na prensa y nes redes sociales pero les protestes individuales son folklore más qu’otra cosa. Asina que vamos dexanos de xugar a los héroes y trabayar, daveres por concienciar a la xente porque namás una acción de mases pue poner al Gobiernu contra les cuerdes.

Illegales pa ser atendíos pero llegales pa pagar

Milio Mariño

La última de les burraes qu'acaba de plantegar el PP ye que los inmigrantes illegales, pa tener derechu a ser atendíos, suscriban una especie de póliza cola sanidá pública, previu pagu de 59,20 euros al mes pa los menores de 65 años y 155,4 pal restu. Lo cuál quier dicir que los mozos tendríen que pagar 710 euros al añu y los vieyos nada menos que 1.865.

La idea, obsesiva, de que la salú tien que dexar de ser un derechu pa convertise nun negociu, llevó al PP a plantegar esti disparate, que nun se sostién non solo dende'l puntu de vista social, éticu o sanitariu, sinón dende la mesma llegalidá pos resulta mui difícil d'entender que'l Ministeriu de Sanidá tea dispuestu a roblar un conveniu con daquién que ta en situación irregular.

La midida, amás d'una inmoralidá, ye una babayada, otra de les munches d'un Gobiernu qu'empezó por llegalizar el blanquéu de dineru y, polo vistu, nun sabe facer otra cosa que recortes y trafullos.

Un Biscuter en Marte

Milio Mariño

De dalguna manera, mentalmente, psicolóxicamente, yá abandonamos la Tierra. La dexadez escontra la nuesa redolada namás pue esplicase por una especie d'instintu de supervivencia xenética que nos fai pensar que vamos poder salir de la Tierra y colonizar otros planetes, o daqué asina, porque, si non, nun s'esplica lo que ta asocediendo, nun tien sentíu.

Yo siéntome totalmente implicáu nesa paradoxa, de casi dexame llevar al debalu por esa corriente de babayada; somos conscientes de lo que pasa, pero tamos como paralizaos.

El párrafu anterior, col que nun puedo tar más d'alcuerdu, ye de Daniel Canogar, un bon fotógrafu. Y, coincidió que, ayeri, mientres lleía les sos reflexones apaeció, en televisión, esi Biscuter que mandamos a Marte. Mira por onde, dixi pa min, yá plantamos un coche onde Cristu dio les tres voces, nel territoriu de los marcianos, nes indies del universu. Acabóse la crisis. Mandamos p’alló xente con dos tolanos, damos machete a los indios y volvemos coles alforxes llenes.

Aniversariu de “La Roxa” Marilyn

Milio Mariño

Güei, esta nueche, cúmplense 50 años desque morrió Marilyn y, a pesar del tiempu pasáu, inda nun s'esclarió si lo que se presentó como un suicidiu nun foi, en realidá, un crime d'Estáu promovíu pola CIA o los allegaos al Presidente, la propia familia Kennedy.

Va unos díes, l'axencia Associated Press pidió al Gobiernu de EE UU, al traviés de la Llei de Llibertá Informativa, que revelara los informes de los díes previos a la muerte de l'actriz pa publicalos coincidiendo col 50 aniversariu. La respuesta del FBI foi: Nun podemos atopar los archivos, perdiéronse.

Los informes, al paecer, nun los tienen pero sí s’encargaron d'espublizar que Marilyn pidiera un visáu pa la URSS, que s'axuntaba con miembros del Grupu Comunista Americanu de Méjico, o que nos sos alcuentros col Presidente reprochába-y la moralidá de les pruebes atómiques.

Nun lo dicen pero lo que vienen querer dicir ye que “La Roxa”, lloñe de ser tonta, habíase vueltu peligrosa y convenía quitala delantre, cuanto primero meyor

Los americanos atopen una solución pa los peos.

Milio Mariño

La empresa Flat-D Innovations, acaba crear un desodorante de flatulencies llamáu Flautulence Deodorizer. Tratase d'una prenda, una especie de compresa, que s'asitiase embaxo la ropa interior, cerca les ñalgues, y absuerbe'l mal golor de los gases.

Según l'Institutu Nacional de Salú Dixestiva d'Estaos Xuníos, la mayoría de les persones producimos, diariamente, de 0,5 a 2 llitros de gas y espulsámoslo en forma de rutios o fumiacos una media de 14 vegaes al día. La mayor parte d'esi gas nun tien golor pero cuando lu tien, cosa que la persona nun pue detectar, prodúcense situaciones embarazoses qu'inflúin, negativamente, na so considerancia social. De cuenta que Flat-D tuvo investigando p’atopar una solución, qu’a la fin atopó y yá entamó a comercializar, al paecer, con bastante ésitu.

La noticia apaeció nun periódicu americanu que celebra l’afayo. Perembargu, a min, quédame una dulda: Solucionaron lo del golor pero… ¿ Y lo de la música?

Les mochiles de los neños faen güecu, ente los llibros, pa la tartera del menú

Milio Mariño

A partir del próximu cursu los padres catalanes van poder añedir a la mochila de los fíos una fiambrera cola xinta. Pero dexar de recurrir al comedor escolar nun significa que aforren los 6,20 euros que, agora, paguen diariamente pol menú.

 La implantación de la tarterina na escuela ye un pidimientu de delles families, pero consideren escesivu que, nes escueles, faigan pagar a les families hasta 3 euros por usar el microondes y califiquen de tomadura de pelo la midida.

 La federación catalana de AMPA solo ve útil l'usu de la fiambrera en casos de neños con necesidaes alimentaries especiales (vexetarianos, con alerxes o con restricciones por motivos relixosos). Les asociaciones de padres tamién tarrecen que detrás d'esta iniciativa s’escuenda un retayu nes beques de comedor.

Candaos nos contenedores pa que la xente nun rebusque na basoria

Milio Mariño

L'Ayuntamientu de Girona va pesllar con un candáu tolos contenedores que ten próximos a los supermecaos. L'Alcalde, Carles Puigdemont, y los Conceyales nun quieren que la xente foce na basoria buscando comida porque, al paecer, peleénse y provoquen altercaos y, también, porque la comida atopase en males condiciones.

Según l'ayuntamientu, a la xente que tien por vezu rebuscar nos contenedores van dayos un vale pa que puean dir a buscar comida al Centru Llocal de Distribución d’Alimentos. Hai un alcuerdo con dellos supermercados pa que suministren a esi centru los alimentos que ten a puntu de caducar.

Quitando que lo de dar vales de comida ye menos que nada, que queréis que vos diga… A min, lo de poner candaos nos contenedores, pa que la xente nun rebusque na basoria, dexame plasmáu. Nunca creyí que llegaremos a tantu.

Matar, con un mandu a distancia, a dalguién que ta a 11.000 kilómetros de to casa

Milio Mariño

Va yá munchos sieglos que camudamos l'instintu animal por una intelixencia que nos lleva a trespasar tolos llendes de la crueldá. L’últimu glayíu en armes son Los Drones, aviones ensin pilotu que permiten matar a 11.200 kilómetros de distancia.

El militar, l'asesín nesti casu, tan nes afueres de Nueva York, sentáu nun cómodu sillón delantre d’una pantalla de plasma dende la que pue achisbar como xueguen los neños en Afganistán, o como se mueve dalguién que considera sospechosu. Namás tien qu'apretar un botón pa que’l sospechosu caiga fulmináu creyendo que lo mató Dios.

El Coronel Branton reconoz que facelo con un mandu a distancia ye una forma singular de matar. Diz que cuando acaba la xornada y conduz rumbu a casa, p'atopase cola muyer y los fíos, entovía siente l'adrenalina de que, va pocu, primió'l gatillu. Tamién diz que, delles veces, igual lo noten un pelín escitáu pero que naide, del so circulo más cercanu, sabe qu’esa tarde lo mesmu mató tres persones. Al paecer esa ye la penitencia, nun poder cuntalo, tener que rumialo solu.