Inocentes

La mio parrafada de los xueves nel progrma Noche tras Noche de la RPA

El mi lio d’esta selmana va cola fecha. Como sabéis, güei ye’l día los Inocentes. Esi día nel qu’avecen a gastase bromes como colocate un moñecu de papel na espalda o atopar noticies falses que los periódicos faen pasar por verdaes. Pero, claro, a estes hores, col día casi acabáu, tendría pocu sentíu qu’intentara davos la inocentada. Si fuere pola mañanina tempranu, que ye cuando tamos despreveníos, entovía. Agora ya tais al tantu y tendría difícil inventar una trola creyible.

De toles maneres, nun van perhí los tiros. Nun tuvi nin tengo intención d’estrumir la mollera pa metévosla doblaba y que llueu, al final, pudiéremos echar unes rises a cuenta de que creyerais la inocentada. Dándo-y vueltes igual lo llograba, pero non lu intenté siquiera porque lo que me llama l'atención, de lo que güei se celebra, ye’l significáu qu’avezamos dar a la pallabra inocencia. Ye qu'oxala qu’esta sociedá nuesa nun tracamundiara los términos y llamara inocente, inxenuu o inclusu bobu, al que va pola vida ensin malicia denguna.

Si lo pensáis un pocu, resulta que la pallabra inocencia ye d’eses pallabres que, al paecer, tienen edá. Tá bien vistu que los neños seyan inocentes pero llueu, cuando crecemos y nos facemos adultos, ya nos pasen a otra estaya. Ya dan por fechu que s’acabó la inocencia y tenemos que saber cómo ye la realidá y la verdadera naturaleza humana. Lo cuál sinifica que nun tenémos otru aquello qu’aceutar y reconocer que la realidá ye fea y que, en xeneral, hai más xente mala que bona. Que’l mundu nun ye un camín de roses y que nun pues dir d’inocente pola vida, porque si vas asina van date hosties hasta nel carné d’identidá.

Esa ye la realidá… La realidá ye que nun pues, nin te dexen, ser inocente. Inocencia sinifica bondá, y lo que te dicen ye que tíes que tener maldá. Que nun pues dir perhí pensando que les coses son como paecen. Que non, que tol mundu miente, escuende cartes baxo la manga y tu tíes que defendete.

Y si nun quies…? Si quies ser inocente… ¿Qué pasa? ¿Si a estes hores lleves un moñecu colgáu na espalda y nun te dio pola gana quitalo…? Qu’habrá xente que s’escoyone de risa?…. Pos que se ría…

Dígolo asina porque pienso que si nun conservamos, siquiera, una dosis mínima, un plizcu d’idealismu, inocencia ya inxenuidá, será difícil que podamos ser felices. Tampoco quiero dicir que traguemos con too. Inocencia nun sinifica inorancia. Sinifica una especial llucidez pa ver les coses a to manera y nun dexate manipular.

Por eso, qué queréis que vos diga… Ya sé que, pa munchos, ser inocente ye un defeutu mui grande, pero pa mi ye una gran virtú. De mou que ya lo veis… A estes hores de la nueche y yo tocando’l tambor. Redoblando pola inocencia anque nun se lleve esta canción.

Milio Mariño

La mar y la navidá

La mio parrafada de los xueves nel programa Noche tras Noche de la RPA

El mi lio d'esta selmana tien que ver cola mar y la navidá. Tien que ver porque fai güei ocho díes, a esta mesma hora, Felipe y Miguel, taben los dos na mar, a trés milles del Cabu Peñes, cola agua pol pescuezu y agarraos a la proa d'un barquín pequeñu, apenes cuatro metros y mediu, pidiendo socorru. Tuvieron asina dolce hores… Dolce hores, de nueche y na mar del Cantábricu. Xusto hasta l’otru día pela mañana, que foi cuando, por fin, pudieron rescatalos.

Dolce hores garraos práuticamente a nada, n'alta mar y de nueche son munches hores, tien que facese mui llargu.

El casu qu'ayer Felipe y Miguel abandonaron l'Hospital de Jove y lo primero que dixeron foi que cuando taben na mar, cola agua al pescuezu, nun paraben de dase ánimos l'unu al otru. Seguro que nun van escaecer esa nueche nin el momentu en que los rescataron. Agora vuelven a casa contentos y dicen que casi en plena forma y dispuestos p’adientrase de nuevu na mar… qu'amás d'oficiu ye una pasión pa estos dos pescadores.

Pa min son dos fazañes: la d'ellos por caltenese a flote y la quienes llograron rescatalos, pero si m’apetez camentalo nun ye solo por eso. Ye porque tamos a una selmana y picu de la navidá, de la famosa cena de Nuechebona, y como siempre falamos muncho del pescáu y del mariscu y de los precios qu'algamen por estes feches. Falamos muncho del preciu y poco del riesgu.

Si yá sé que los pescadores, d'esi preciu ven solo una parte y nun ye la más grande. Pero más al mio favor… Más pa mirar al cielu y la mar, dende la oriella, y convidavos a pensar que cuando’l tiempu se pon gafu y vemos eses foles xigantes, neses condiciones hai quien se mete nuna lanchina de cuatro metros y mediu y sal a pescar. Y tamién los hai qu'arriesguen la vida polos cantiles pa coyer eses percebes que van llucir llueu na mesa p'arguyu de los anfitriones.

Lo de Felipe y Miguel…. Y lo de tantos otros qu'arriesguen la vida na mar pue sirvinos pa pensar que'l pescáu y el mariscu nun se cueyen, precisamente, nel muelle. Salir a pescar, o a coyer mariscu, por estes feches nun ye un negociu ye la única forma de vida que tienen dalgunos.

Asina que nun sé a vosotros pero, a min, dende'l calorín que fai equí dientro dame respigos pensar como tará agora la mar. Tará d'un fríu que pela mientres nós tamos contentos y arrodiaos de lluces de colorinos esperando la Navidá. Esperando vivir esi cuentu de tolos años. Ye un cuentu que presta pero préstame, inclusu, más que Felipe y Miguel volvieren a casa sanos y salvos. La so aventura y pa cuntalo… pue quedar como'l meyor cuentu de navidá esti iviernu.

Milio Mariño

Lo que val un asturianu

La mio parrafada de los xueves nel programa Noche tras Noche de la RPA

El mi lio d'esta selmana ye d'eses coses que si non les dices revientes. Llevaba dándome vueltes dende facía dos o trés selmanes y nun principiu dexáralo pa prau por aquello de non lliala cola rodiella de Cataluña, pero cuando vi que los presidentes d'Asturies, Galicia y Castiella y Llión, axuntábense n'Uviéu y clamaben contra la financiación autonómica, nun pudi pasalo por altu y dexalo como si nada.

D'eso se trata, de la desigualdá de tratu na financiación autonómica. Dalgo que nun ye d'agora, que yá vien de llargu, pero resulta que si en cuenta de correxílo entovía lo ponen peor ye cuando unu s’enciende y esplota llenu de rabia.

Tamién esplotaron, pero cola boca pequeña, los presidentes d'Asturies, Galicia y Castiella, qu'esti llunes n'Uviéu, trataben de ponese d'alcuerdu en trés custiones nes qu'anden a la par: la llucha contra los incendios forestales, el declive demográficu y los planes de reforma de la financiación autonómica.

Dicía que falaron cola boca pequeña porque los trés pertenecen a partíos políticos, dos al PP y unu al PSOE, que tuvieron d’alcuerdo col cupu vascu… Con eso de que se rebaxe la cantidá qu'Euskadi va tener que pagar al Estáu en conceutu de Cupu, los próximos cinco años…. Que, pa nun andar enredando y que lo tengáis claro supón, según los últimos datos publicaos pol Ministeriu de Facienda, qu'Asturies recibe del Estáu, al añu, 2.249 euros de financiación per cada asturianu mentes que los vascos, pol mesmu conceutu, reciben 4.654 euros.

Yá sé que l'agraviu nun ye solo con Asturies que tamién hai diferencies importantes con otres comunidaes autónomes. Pero equí tamos falando d'Asturies y la diferencia ente lo que recibe, del Estáu, un asturianu y un vascu son 2.407 euros per añu… Recibimos la metá menos, una cifra qu’entovía pue aumentar cola rebaxa del Cupu.

Cuando los datos son asina de claros pocu más hai que dicir. Hai que preguntase, si acasu, por qué los Presidentes d'eses trés Comunidaes Autónomes protesten pola inxusticia y resulta que los partíos políticos a los que pertenecen acaben d'aprobala nel Congresu los Diputaos.

Supongo qu’agora entendéis la mio indignación del entamo. Pal Estáu, un asturianu val la metá qu'un vascu. Y la cosa nun acaba ehí porque eso que tán falando de camudar el modelu de financiación de Cataluña, como una ufierta pa solucionar el conflictu, nun ye otra cosa que da-yos más perres a ver si asina nun aportunen cola independencia.

Yá me diréis si nun ye pa tar indignáu. Resulta que'l País Vascu, col PIB per cápita más altu d'España yá nun ye que nun apurra nada, sinón que recibe fondos del restu d'España. Ye pa ponese d'un humor que te lleven los demonios. Pero tampoco quiero amargavos esti ponte festivu y estos díes tan guapos. Yo yá me desafogué y ehí queda eso.

Milio Mariño