¿Onde nos lleves Mariano?

Milio Mariño

Quien tien vocación, y se fai, Rexistrador de la Propiedá nun pue ser líder de na. Mariano nunca lo foi nin, mialma, lo sedrá. Pero la cosa pinta peor, tampoco ye bon xestor. Ye un tramposu que llegó al Gobiernu como llegó y, en cuantu vio lo qu'había, plasmó. Fexonos trampes a nos y pensó que podía faceles a too dios.

 Ehí lo tenemos, dando palos de ciegu y quedando en ridículu cola Unión Europea, que nun traga cola solución, modelu trileru, que propunxo pa Bankia.

 Diz el refrán que pañase enantes a un mentirosu qu'a un coxu, pero esti ye les dos coses, miente y acoxa de tal manera que nun se yo si nun sapirá d’esmenu y nos dexará a tomar pol sacu.

¿Por qué toca la campana Rato?

Milio Mariño

Va dos selmanes, lo menos, que mio padre, que yá tien 87 años, nun hai día que non m'entrugue estu que paso a dicivos:

¿Como ye qu’agora, siempre que Rato sal pola tele sal tocando la campana ¿ A qué se debe ? ¿ Que significa ?.

Camiéntolo por si podéis apurrime dalguna idea, dalgo que lu convenza. Nun val que son imáxenes d'archivu, eso ya-y lo dixi milenta veces y dizme que nun diga tonteríes, qu'un paisanu d'esa categoría nun sal tocando la campana por un petite. Que tien qu'haber dalgo más, dalgo qu'igual quier dicinos y non lo dexen.

Paoletto:¿Ánxel de la Guarda o Demoniu que busca pasta?

Milio Mariño

Diréis que ye  morbu o curiosidá de la mala pero prestaríame conocer lo que Paoletto, el Mayordomu del Papa, guarda neses caxes de zapatos apinaes de cartes y documentos que diba suministrando, en pequeñes diócesis, a un periodista italianu.

 Esi ñeru del cuervu, asina ye como lo llamen, hai quien diz que lo fexo por un deséu altruísta d'ayudar a la ilesia sacando a la lluz los casos de corrupción y les intrigues de la  curia romana. Otros, en cambiu, atesteren que d’altruísta nada, que namás buscaba facese ricu y que, dalgún día, Jorge Javier lo llevare a Salvame.

Alcordando Eurovisión

Milio Mariño

Te canten cuando naces y tamién nel adiós… Dicía Massiel en 1968,  cantando en Eurovisión, cuando yera xoven, como yo, y avezaba a venir por Uviéu. Aquel Uviéu de Tassili y Cechini na cai Uria, de la cafetería Ronda col mural de Navascués y de Choko y Logos, como cafeteríes de lo más inn. Güei, lleo qu'anuncien Eurovisión y alcuérdome de too aquello y d'ABBA cantando Warterloo un pelín más tarde, poco enantes de que morriera'l ditador.

Que celebren Eurovisión en Azerbaiyan, que ye onde lo van celebrar, pue ser una premonición. Vamos camín de paecenos a esi país que naide conoz y asitiase en casa dios.

Nun hai drechu, y xusticia menos.

Milio Mariño

Dicíalo Murfi y tenía abondu razón: Tolo que va mal pue dir peor. Mirái, sinón,  onde foi a parar la rodiella del Conseyu del Poder Xudicial. Oyendo lo que diz Carlinhos Divar, dan ganes d'emigrar a Marruecos calzar una chilaba y entamar a tocar la flauta hasta que la culiebra salga del cestu. Que, mialma, nun va salir porque amás de presuntu gorrón ye más chulu qu'un ocho y que Ruiz Gallardón, quien pa quitái fierru al asuntu dixo que’l Presidente saliere fortalecíu. Y debió salir porque acaba dicir que nun dimite, nin presenta cuentes nin tien pensáu dexar de dir a Marbella los vienres y rumbar lo que se tercie.

Ye mentira, equí nun paga too Dios

Milio Mariño

 Rajoy fai la rosca a la ilesia porque piensa que Dios va tenelo en cuenta y salvanos. Eso esplica que’l PP, CIU y UPyD tiraren ayer embaxo, na Comisión Constitucional del Congresu, una propuesta d'IU, apoyada pol PSOE y el Grupu Mistu, y cola abstención del PNV, que planteaba eliminar los privilexos de la Ilesia  y abrir el camín pa que se financiare por ella mesma.

Ta vistu que somos más santurriones y más papistes que’l Papa. El Gobiernu d'Italia presidíu por un católicu, decidió esti añu esixir el pagu del IBI a la Ilesia. Y, por si nun fuere bastante, la Comisión Europea acaba mandar una carta al Gobiernu d'España obligándolo a cobrar el IVA a los Obispos que, polo visto, non lo cobraba.

Esperanza Aguirre la payasa del circu

Milio Mariño

Ayer asistimos a otru espectaculo de los munchos que'l PP prepara cuando-y sal torda la cosa. Ayer volvió a salir Esperancina y, pa entretener la espera hasta que finara la fuelga de la enseñanza, regalonos otru chiste col aquello de que la xente lo garrara pol asa y escaeciera lo que daveres yera importante. Buenu, pa eso y pa que les tertulies de los fachas tuvieren carnaza de sobra pa entretener la nueche.

El trucu yá fiede pero entovía hai xente que pica. Ocúrreseme, doña Esperanza, qu'el asuntu esclariase con esta esplicación que-y apurro: Si xiblen l'himnu d'España ye porque nun tien lletra.

Hai qu’auditar a De Guindos, nuna selmana cayó tres veces del árbol

Milio Mariño

Mentes Montoro acaballa la moto del deficit y viaxa por Castiella y Lleón, Madrid y Valencia, De Guindos volvió a sapiar del árbol embaxo y, p’auditar a los bancos, escoyó dos empreses que valga la Vixen santa. Escoyó a Oliver Wyman, que  foi multada en 2010 por Hacienda, con 77.683 euros, por fraude nel impuestu de sociedaes. Y escoyó, tamién, a Roland Berger, que ta buscando socios n’España pa montar, nel 2013, una Axencia de calificación de riesgu.

Con estes empreses  vamos quedar auditaos pol forru los tolanos, que ye lo que más priesa cuerre porque, cada vez, los tenemos más apegaos al furacu del cursu.

Montoro abre una llavadería nel sótanu

Milio Mariño

Unu nun sabe nunca por qué manes pasó'l dineru que tien en bolsu. Casi val más nun sabelo. De toles maneres, yá que toi xubiláu tenía l'enfotu de que'l dineru que me paga l'Estáu venía de los que coticen por trabayar y los que paguen impuestos. Eso foi hasta va pocu, pero col Decretu que prepara Hacienda, col Gobiernu de Rajoy dedicándose a blanquiar dineru, la pensión pue venir de la droga, de la trata de blanques o de lo que maquilaron Urdangarin y El Bigotes. Yera lo que nos faltaba p'amestalo a los recortes.Siempre llavaba les manes depués de venir del Bancu pero agora voi llavales con xabón del llagartu.

Montoro quier interveninos pero nun sabe si d'un orzuelu o un granu nel cursu.

Milio Mariño

Onde yá yéremos la risión, apaez esti cañaveru con gafes y amenaza con mandanos la Guardia Civil. Ye de traca, tuvo tres meses ensin dar un palu al agua, esperando que pasaren les elecciones andaluces, y agora entra-y la priesa. Como somos Asturies y enriba salio-y torda apuntase al estrambote. Sabe con quien lo fai, si fuéremos Cataluña camudaba los calzonciellos tres veces enantes de dicir esa babayada. Nun se vosotros pero, si de min dependiera, facia como esa vaca que pongo a la vera, daba-y una patada al calderu y a tomar pol sacu.

En mayu podemos armar la de Dios o dir con flores a María.

Milio Mariño

La política de meter mieu, el pánicu como métodu de gobiernu, ye lo que los fachas siempre suañaron pa echar mano del autoritarismu y sotripanos por riba y por baxu hasta dexanos que nun diemos pie con bola. L'oxetivu ye desmoralizanos pa que, llueu, aceutemos el castigu. Nun puen siguir engañándonos. Nun pue ser que la única solución seya volver al Sieglu XIX. Y, entovía menos, qu'aceutemos que faigan y desfaigan de forma semeya a como s'aveza a facer en cualquier dictadura. Ye mentira que namás se puea facer lo que tan faciendo. Ye mentira tamién eso de que nos pongamos como nos pongamos nun van cambiar nada les coses. Claro que podemos cambiales, siempre pudimos.

Que los neños apriendan a cazar ye pura supervivencia.

Milio Mariño

Los roxos y los ecoloxistes, ya imaxino que tamién los gais y les llesbianes, que s'apunten a tou y nun pierden foliada, punxeron el berru nel cielu porque la Xunta de Castiella y Llión destina 303.000 euros pa dar clases de caza nos colexos públicos a los neños ente 7 y 12 años d'edá. Siento nun tar d'alcuerdu col roxeríu. Los del PP tienen una visión de futuru más realista y sensata. Viendo como tán les coses, les nueves xeneraciones tendrán que volver a la caza y a la llucha de tribus si quieren sobrevivir. Refiérome a la llucha de tribus, y non de clases, porque como agora naide se considera clase baxa, la clase baxa desapaeció. Y asina nos va.

Nun ye Rato, son aguarones por tolos sitios

Milio Mariño

Había un Rato nun bancu y dicía Mariano: total, pa unu qu'hai, dexa-ylo que roya. Que roya hasta que se fartuque. Mamina que pufu. Vaya boquete dexó esti Rato que, pa nun ser menos que'l padre, fexo otra semeya pero más grande. La diferencia ye que'l padre foi a la cárcel y esti marcha xiblando tangos. Esti escapó del FMI, enantes de que lo echaren por incompetente y por vagu, fichólo Esperancina y ehí lu tenemos, dexándonos 31.000 millones de pufu y cobrando por dimitir 1,2 millones d'Euros. ¡ Viva Mariano! Rebaxa'l despidu de los obreros y a unu que nos lleva a la ruina da-y una millonada. Pa rematar la xugada, esti vienres que vien, Mariano va destinar, los 7.000 millones que nos quita en Sanidá, pa pagar parte del pufu del Ratonin.

Espero que güei gane la gauche

Milio Mariño

Gane quien gane, Hollande o Sarkocy, nun va pasar como equí, l'Estáu Social, la sanidá, la educación y el seguru de desempléu tán aseguraos. Naide plantega tampoco una reforma llaboral selvaxe, los dos candidatos comprométense a salir de la crisis ensin facer reformes estructurales. Conozo Francia perbién, tuvi más de 20 años viaxando a París cada dos meses y nunca entendí que nos fixaremos más nos americanos que nos franceses. Ciertu lo del chauvinismu y la grandeur pero tamién lo de la liberté, égalité y fraternité y el Mayu del 68. Pol bien de los franceses y, sobremanera, pol nuesu espero que güei gane la gauche.

Una idea, nueva y moderna, sedría volver al Fielatu.

Milio Mariño

Nesta carrera que lleven por sacar perres de cualquier sitiu, y quitanos lo pocu que tenemos, pa facer d'España un país prósperu y modernu, entovía non m'esplico como a dengún ministru del PP se-y ocurrío recurrir al Fielatu. Dalgo asina debíen tar pensando cuando llanzaron el globu sonda d'apoquinar poles Autovíes pero, pa min, que nun s'atrevieron a dicilo. Pues nada chachos, a por ello, entovía queden per ehí casetos y onde nun los haya facémoslos con cuatro maderos.

Son los Calatrava, hermanu

Milio Mariño

Nos grandes negocios siempre hai un llistu que gana y un fatu que paga'l patu. Agora nos enteramos que Santiago Calatrava, el que fexo l'adefexu d'Uviéu cobrando 7,5 millones d'euros, cobró del Gobiernu Valencianu na menos que 94 millones pol proyeutu de la Ciudá de les Ciencies y les Lletres. Esti Calatrava que mento nun ye'l de la foto qu'amiestu pero atestero no que dixi al entamu, estos negocios fáense a dúu: siempre intervién un fatu y un llistu. Non m'estrañaría un pimientu que'l fatu la foto fuere'l mesmu que punxo les perres en Valencia y Uviéu. El biecu tien tola pinta de que recueye'l momentu de cuando vio la factura.

Gracies a la llibertá d'espresión

Milio Mariño

Güei, 3 de mayu, celebrase, en tol mundu, el día de la llibertá d'espresión. Un drechu fundamental que sirve de muncho porque gracies a la llibertá d'espresión ye posible que cualquier pelagatos puea dicir d'un gobernante, o d'un rei que ye fatu o inútil sin que lo cuerran a gorrazos. Y al gobernante, y al rei, tampoco.

Lo de les autovies de peaxe ye pillaxe

Milio Mariño

Viendo los atracos que fai esti Gobiernu, y los qu'anuncia que va facer, apúntome, yá mesmo, a la desobedencia civil. Asina que como quien da primeru tien tiempu d'escoyer la morrada, ocúrreseme que nos ponen a güevu pasar pol Negrón en blancu. Tirar de frende y dici-y al del casetu que'l peaxe pagalo Rita, que ye prima de Montoro y pariente de Marianín. Si lo de salir a la cai tantu yos da que-yos da lo mesmu, vamos rascayos el bolsu. Sinón, cola carrera que lleven, d'equí a nada implanten el co-cagu. El cobranos por dir al retrete.