Los vieyos y los discapacitaos primero, pero non pa salvalos, pa desfacese d’ellos

Milio Mariño

El Gobiernu de Cataluña confirmó ayer que nun tien perres pa pagar, esti mes, a les Residencies d’Ancianos, les Residencies de Discapacitaos y los Centros d’Atención a los Enfermos Mentales. Una midida qu'afeuta a 100.000 trabayadores, que van quedar ensin cobrar, y a nun se sabe cuanta xente, ancianos y dependientes, que quedarán ensin atención.

El problema dicen que ye puntual, que’l mes d’agostu van a poder pagar, pero naide esplicó entovía como ye que cuando falten perres los primeros que paguen el patu son los ancianos, los discapacitaos y los enfermos mentales.

Tábemos que sí que non pero estu yá nun ye un suponer, estu ye que nos declararon la guerra y disparen a matar. De mou que quien entovía tenga duldes del bandu al que pertenez, o nel que quier alístase, yá pue dir espabilando porque, en cosa d’un mes, al que nun te d’esta parte llevámoslu por delantre.

Pal cura de Padrón la xente ye como los pimientos, unos comulguen y otros non.

Milio Mariño

El pasáu 6 de xunetu, Ramón Barral, cura párrocu de Padrón, negóse a dar la comunión a Mónica Suárez, una rapaza que ye deficiente mental.

El casu corrióse como la pólvora y, a entrugues d’un redactor de La Voz de Galicia, dixo’l párrocu que si una persona ye subnormal nun debe acercase a comulgar. Depués intentó arréglalo diciendo que nun tien nada contra la xente asina, qu’esti branu diere la confirmación a un minusvalidu, que tamién ye deficiente pero tien otra actitud.

La madre de Mónica diz que dirá au tenga que dir pa defender a la so fía de lo que considera un atropellu. Tamién ta dolida cola xente que taba en misa aquel día porque naide se punxo de parte d’ella nin llamó l’atención al cura.

Pal párrocu de Padrón, los deficientes y los discapacitaos nun son fíos de dios. Reconoz que, en opinión de dalguién, igual pudo enquivocase pero qu'él non lo percibe asina na so conciencia. Que fexo lo que tenía que facer.

Rajoy fexo la mili llimpiando la escalera del cuartel

Milio Mariño

Nuna entrevista, que se publicó va tres años, Rajoy confesaba que cumpliera’l serviciu militar na Capitanía Xeneral de Valencia, onde-y encargaron, como misión principal, la llimpieza del cuartel y en concretu d'una escalera.

Al pocu de publicase la entrevista, nuna conversación informal con un grupu d'invitaos qu'asistíen a la recepción de la Familia Real nel Palaciu d’Oriente, hubo unu que-y entrugó, estrañáu, si yera verdá lo que dixera de la mili, si d’aquella nun taba estudiando na universidá.

Rajoy retrucó que non solu acabare la carrera de drechu sinón que, entós, yá yera, incluso, Rexistrador de la Propiedá, datos que’l Capitán conocía de sobra, pero que, asina y too, destinólo a la llimpieza.

Nun sé yo quién podría ser aquel Capitán, pero mialma merez una medaya. Supo ver, enantes que naide, que Rajoy nun valia pa otra cosa.

Estu ye lo que somos pa los nuestros socios d'Europa

Milio Mariño

España convertióse nun enfermu contagiosu que pon en riesgo a otros países de la Unión Europea. Esi ye'l diagnósticu que fai The Economist nun artículu que sacará mañana na edición de papel y yá publicó en Internet.

La revista británica ye más dura, y crítica, con Rajoy que los medios de comunicación españoles. Alcuerda que Rajoy dixo, va un añu, que la subida del IVA yera un absurdo que namás valía pa castigar a los probes y reducir el crecimientu. Y, a estu, amiesta que Valencia, que yera pa él un exemplu, acaba de solicitar el rescate, lo cuál fai suponer que les otres Comunidaes, gobernaes pol PP, tan igual o peor.

The Economist encabeza'l nomáu artículu col cartelu que figura equí enrriba. Quier dicise que si'l problema, como dicía'l PP, yera de confianza, Rajoy tien el méritu de que, en ocho meses, fexo qu’España ficiera más el ridículu que Zapatero en ocho años.

Dicíalo'l cuervu d’Esopo: tirar piedres dientro la xarra ye la única solución

Milio Mariño

Cuntaba Esopo qu'un cuervu que morría de sede vio una xarra con agua, pero tenía tan poca que nun yera quien a algamala col picu. El casu que depués de dellos intentos, al páxaru ocurrióse-y que la solución yera tirar unes piedres dientro pa que l'agua xubiere de nivel y asina poder beber.

Quixo la casualidá qu'ayer mesmu, Nicola Clayton y otros collacios del departamentu de Psicoloxía Esperimental de la Universidá de Cambridge dieren a conocer un estudiu nel que demuestren que los cuervos y los neños menores d'ocho años solventen el dilema d'Esopo con idéntica eficacia: al quintu intentu. Dicen los científicos que los dos, cuervos y neños, lleven incorporáu, por istintu natural y ensin falta de deprendelo, como funcionen les lleis de la física.

D’estu que voi dicir en Cambrigde nun dixeron nada pero a min chocame que los neños, cuando crecen, pierdan ese istintu y anden a vueltes con que si tirar piedres dientro la xarra ye la solución. Nun hai otra si nun queremos morrer de sede.

Otru escándalo pa plasmar pero este ye la bomba

Milio Mariño

Pedro Morenés, que güei ye ministru de defensa, yera, va cinco años, ún de los xefes d'Instalaza una empresa de Zaragoza que fabrica armes, municiones y bombes de recimu. El casu qu'España, el Gobiernu de Zapateru, firmó un conveniu internacional contra eses bombes y, como ye lóxicu, dexó de comprales.

Socedió entós qu'esi xefe d'Instalaza, el tal Morenés. denunció al Gobiernu por dexar de comprar les bombes y nun cumplir un contratu que teníen firmáu diba tiempu.

La denuncia siguió’l so cursu, el PP ganó les eleiciones y Rajoy tuvo la gran idea de nomar Ministru de Defensa al que fuere xerente de la empresa de bombes, armes y municiones, a Pedro Morenés, qu'agora como ministru va pagái a la que fuere la so empresa una indemnización de 40 millones d’euros.

La hestoria paez cuentu risa pero nun tenemos esa suerte, ye tan real como que tamos a 25 de xunetu, día de Santiago Apóstol.

La plantilla de la ilesia nun se recorta nin se privatiza nin dexa de cobrar la extra

Milio Mariño

Al Gobiernu y a la prensa, al paecer, non yos interesa ponenos al tantu de cuanta xente mueve la ilesia. Los medios de la drecha fabricaron datos falsos inflando’l númberu de políticos pero nun dixeron nada de los que trabayen pal cleru y cobren de los nuestros impuestos.

Picáu pola curiosidá toméme la molestia de dir recopilando datos, siempre oficiales, y ocurrióseme xuntalos pa tener una visión de conxuntu. De mou que lo qu’apurro equí embaxo ye la plantilla, sin contar los que trabayen nes oficines, de la Gran Empresa pública llamada Ilesia Católica:

Cures de parroquia.- 16.937. Capellanes Castrenses.- 110. Monxes.-38.730, de les cuáles 13.000 son de clausura. Frailes.-11.647. Profesores de Relixón.- 18. 216. Arzobispos, 14. Obispos, 52. Obispos Auxiliares, 8. Obispos eméritos, 37.

Total de plantilla, y ensin dengún ERE a la vista, 85.761.

Una sorrisa a propósitu de los impuestos

Milio Mariño

Dau que ye domingo, salió'l sol y yá tamos fartos de que nos amarguen el branu, ocurrióseme trayer a colación dellos impuestos que, entovía, nun se-y ocurrieron a Montoro y paécenme más orixinales que calcayos el 21 % a les llibretes de los guajes.

En Maryland, EE.UU, les cases paguen impuestos según los wáteres que tengan y en Arkansas los que llucen un piercing o un tatuaxe paguen un 6% más que los que nun tienen decorada la pelleya.

Nel sieglu XVII, en Inglaterra, pagaben impuestu los qu'usaben sombreru. Y güei, agora mesmu, en Irlanda y Dinamarca tan pensando poner un impuestu polos peos de les vaques, causantes según la FAO, del 18 % del efeutu invernaderu.

Perembargu, de toes les propuestes curioses la que más polvarea ta llevantando ye la del economista xaponés Takuro Morinaga, que propón que los que seyan guapos y solteros deberíen pagar más impuestos que los feos.

Rajoy ye un pagafantes convictu y confesu

Milio Mariño

Bastaron seis meses pa velo ensembre, Rajoy quiciás valiera p’alcalde pero nun ye líder nin sabe llevar un Gobiernu. Nesti tiempu nun fexo otra cosa que fabricar enemigos, enfotáu en qu’asina díbemos mirar pa otru sitiu y dexalo tranquilu.

A la faltosada de presumir que yera él, el que presionaba a los países europeos vieno esi rosariu de culpes que foi semando al debalu: la herencia de Zapateru, los sindicatos, les empreses publiques, les autonomíes, los conceyales, los funcionarios y agora, lo últimu, la Renfe y el Feve, qu’acaba ponelos a les pates de los caballos hasta qu’atope otru reu.

Nestos seis meses Rajoy nun dio una a dereches, nin a esquierdes, al centru, o a voléu, dio palos de ciegu, estrozando tol creitu q’una mayoría de xente punxo-y nes manes enfotada nes sos promeses.

Si tuviera dos deos de frente entregaría la ferramienta y dimitiría yá mesmu, pero como ta vistu que non los tien hai que llargalo cuantu primeru meyor. A ser posible enantes de que faiga una hecatombe.

Sí que se puede, cómo nun se va poder

Milio Mariño

Na manifestación d'ayer, en Xixón, munchos nun esperamos a la cabecera nin a les pancartes, llantámosnos na cai y fuimos, pasín ente pasu, hasta Begoña.

Al contrariu qu’otres manifestaciones nun había allegría nin aire festivu, había indignación. Rabia fría, llucida y racional. Una rabia que convidaba a responder, a esos vanidosos que sonríen y aplauden los retayos, que si creíen que díbemos a resignanos ye una evidencia más de que nun nos representen nin nos conocen. 

Tal como tán les coses, claro que vamos tener que sufrir pero sufriremos por defender lo nuestru, lo que tanto nos costó conquistar, non pol sacrificiu qu'esti Gobiernu nos quier imponer.

El Rei regalónos otru elefante pa la coleición

Milio Mariño

Qué dalguién trabaye cuando tendría que tar de baxa nun ye una fazaña ye una irresponsabilidá del copón. Pon en peligru la so salú y la de los demás. Por eso que nun-y veo la gracia a lo qu'ayer dixo'l Rei, quixo facese'l simpáticu y volvió a meter la pata hasta'l corveyón.

Pero nun ye solo eso, la faltosada va más alló. Hai que tomala pol exemplu que nos quier dar. Por esa ideya, puerca y clasista, de que la xente del pueblu nun tien otru aquello que trabayar anque te morriendo. Por esi mensaxe de que lo primeru y principal ye trabayar pal amu y señor porque l'amu ye quien nos da de comer y gracies a él podemos vivir.

En cuenta tar en Moscu taba meyor pasiando los ñetos. Vamos sobraos de simpáticos, lo que daveres echamos en falta ye xente con xaciu y sentíu común.

¡¡ Hai que jodese !!

Milio Mariño

Francisco Javier Aguilar Viyuela, que ye’l marido de la Delegada del Gobiernu en Madrid, Cristina Cifuentes, ta en busca y captura pol robu de 45.085 euros, según apaeció publicáu nel Boletín Oficial de la Comunidá de Madrid.

Esti puntu, del que nun figura que te separáu de la so Gobernadora muyer, tenía un estudiu d'arquitectura, mui rellacionáu coles empreses constructores que trabayaben pa los Ayuntamientos de Madrid gobernaos pol PP.

Cuenta l'abogáu que lleva'l casu que'l tal Aguilar Villuela dexó de pagar a los empleaos alló pol añu 2009 y que nin siquiera se presenta a les demandes y los xuicios que lu citen nos xulgaos de Madrid.

Paez mentira que Cristina, que tan bien lo fai dirixendo a los policíes que carguen contra los manifestantes, seya tan torpe a la hora de mandayos qu'alcuentren y prendan al lladrón del so home, al que tolos díes duerme con ella.

A los policíes hai que poder tomayos la matricula.

Milio Mariño

Cuando’l to fíu te pregunte, güei, que ficisti pol so futuru, espero que-y digas que-y pegaste a un paisanu que lo defendía, dixo-y el paisanu qu’apaez sangrando na foto al policía que lo zurró.

Cuéntalo un periodista que presenció la carga policial y tamién vió como dellos de los agredíos entrugaben a los agresores au taba la so placa d’identificación, que non la lleven porque, al paecer, dexó de ser obligatoriu llevala porque asina lo autorizaron cuando lo del 15-M.

L'anonimatu y el sabese impunes fai posible que los policíes más violentos y sangrinos abusen de la xente cometiendo too tipu de tropelíes. De mou que’l primer pasu, y pal que, dende llueu, nun hai escusa denguna ye que cada policía lleve’l númberu d’identificación visible.

Tien que ser abondu difícil dirixir dalgo que ye la nada

Milio Mariño

A Juan García Salas, direutor del aeropuertu de Castellón tengo que reconocéi un ramalazu llíricu que nun ye corriente nos altos cargos del PP de la Comunidá Valenciana. L’otru día, nun reportaxe de la televisión France 2, dixo que l'aeropuertu de Castellón taba vaciu como podía talo El Muséu del Louvre un sábadu pola nueche.

 La comparanza mialma paezme preciosa. Lo malo que tal como tan les coses, anque faiga frases asina, hai quien diz que nun ye pa cobrar 84.200 euros al añu, que ye lo que cobra, por dirixir un aeropuertu que nun tien aviones nin xente, nin denguna actividá conocía.

El pueblu volvióse tan materialista que namás piensa nes perres, nun aprecia otres cualidaes que pa si quixeren los direutores que nun saben falar d’otra cosa que de cuentes de resultaos, balances y rentabilidaes.

Una diputada a la que-y presta joder

Milio Mariño

Val que nun dixisti lo que dixisti pola xente que ta nel paru, aceuto culiebra como animal domésticu más cariñosu, sí cueye, qu'un perrin cuzu y falderu. Pero, entós, ties qu'aclarar a que vieno aquello: ¿Quién son los que tienen que jodese? Dinoslo cuquina… Venga, que nun se diga que yes fía de Fabra. Quién son: ¿Los mineros, los funcionarios, los xubilaos, los dependientes, los guajes pequeños, les muyeres…? ¿Too mariasantisima menos los del PP ?

Si ye asina abúltenme munchos. Mialma que nun vas dar abastu a joder. Van llámate la ninfómana del recorte. Y eso, nuna rapaza de bona familia, nun ta bien.

Rajoy lleva al Rei de cacería

Milio Mariño

Polo visto nun escarmentó, nun tuvo bastante con aquella cantada que lo llevó a pidir perdón. Dixo que non lo facia más y volvió a mentir. Ehi lo tenemos, a la vera d'otru mentirosu que llegó al poder con trampes y babayaes esin ton nin son.

Unu, Xuan Carlos, xuró los Principios del Movimientu y l'otru, Rajoy, xuró y perxuró que nun diba xubir los impuestos.

Dos mentirosos al frente d’un país onde’l “llistu”, el jeta y el sinvergoña siguen teniendo meyor cartel que’l honrráu.

Güei, los dos xuntos cazaron otru elefante d’esos que, decíen, había que matalos porque taben pachuchos. Güei cazaron-nos bien cazaos pero nun tamos muertos, entovía podemos alendar y dayos un bon trompazu.

Reíse a lo fatu y faltando al respetu

Milio Mariño

Munchos somos a entruganos de qué se reíen, ayer, y que yera lo qu’aplaudíen los diputaos del PP cuando Rajoy terminó esi discursu de medíes qu'afueguen a los probes dexando a los ricos a flote.

Nun sé sabe si lo aplaudíen dando-y les gracies por castiganos o animándolo pa que nos castigue más.

Importen los fechos pero tamién los xestos.

Camentáronse abondo les llárimes de la ministra italiana cuando anunció los recortes. Hubo quien dixo que menos llarimes y más mirar pola xente del pueblu. Toi d’alcuerdo pero pa nos quixera yo esi plizcu de sensibilidá y non la faltosada, y l'espectaculo, de los diputaos y diputaes del PP aplaudiendo. Si tuvieren un mínimu de vergoña, que non la tienen, nun digo que se punxeren a llorar pero lo que fixeron ye una sirvengozonería y una falta de respetu. Un despreciu impropiu de quienes foron elexíos pa representanos.

Los nuestros en Madrid y Goldman Sachs, nel Musel, faciendo negociu

Milio Mariño

Mentanto que los mineros caminen hasta Madrid pa pidíi al Gobiernu que pague lo que-yos debe, y el Gobiernu retruca que les mines hai que pesllales yá mesmu porque son una ruina, resulta que Golman Sachs, ún de los grupos inversores más grandes del mundu, ta apilando nel Musel cientos de miles de tonelaes de carbón colombianu, que pretende vender nel mercáu de futuros, nuna operación especulativa cola qu'esperen llograr un beneficiu astronómicu.

El carbón qu'atroquen nel Musel tan comprándolo, alló por suramerica, a 61 dólares la tonelada y piensen vendelu, a 97, d'equí a un añu.

Ye comu si nos metieren l'agua en casa y non mos enteráremos. El Gobiernu ta frayando a los nuestros a palos y afalaga a los especuladores pa que faigan negociu. Asina ye como tan les coses.

Nun hai día que nun se descubra otra estafa.

Milio Mariño

Va pocu que tres de los principales llaboratorios del mundu, Glaxo, Abbot y Pfizer, fueron multaos, con más de 2.000 millones d’euros, al demostrase qu'inventen enfermedaes que nun esisten y asinen-yos medicamentos que nun valen pa nada nin la xente precisa.

Calculen que, polo menos, dende fai trenta años que vienen faciendo esa práutica y, anque nun ta probáu, camentase que, en dellos casos, amás d'inventar enfermedaes tamién les provoquen.

 Ta vistu que pa esti sistema, que toos dicimos ye’l meyor y l’únicu posible, namás hai una poca xente que ye persona, los que tienen dineru a maza, el restu somos repla. Estafen-nos los bancos, los llaboratorios, los políticos y too mariasantísima

Quiérovos nun sabéis cuantu

Milio Mariño

Dende va unos díes, cada vez qu’abro la mio páxina, alcuéntrome, na esquinina drecha, con una moza, de Solteres en Facebook, que m’ofrez un branu sexy.

Embaxo d’esi anunciu apaez otru, de tenemosunaedá.com, que m'entruga si tengo problemes col pirindolu y apúrreme un teléfonu por si quiero pidir ayuda.

Sois un montón les amigues y los amigos colos que, va tiempo, comparto amistá. Y, queráis creyelo o non, quiérovos nun sabéis cuantu. Pero, pa ser xustu, mialma tengo que reconocer que denguno tuvistéis esi detalle.

De toles maneres voi siguir queriéndovos igual. Ente otres coses porque si me dan a escoyer ente un branu ñubláu, sexy o con sol, casi prefiero lo últimu. Y, no tocante a lo otru, qué queréis que vos diga, tampoco voi descubrime.

¿Cuantes perres tien la ilesia nel calcetu ?

Milio Mariño

Mal debe tar la cosa cuando'l más importante lladrón d'arte resulta ser un electricista beato. Peor me lo ponen cuando esi lladrón tenía nun garaxe, qu'usaba como trasteru, más d'un millón d’euros, cartes personales de los prelados, llibros de contabilidá y nun se cuantes reliquies.

¿Qué pasa que los cures echaben en falta El Códice Calixtino y nun s'ocupaben de que-yos faltaba un millón d'euros ? ¿Da pa tantu esi negociu ? ¿ Llibrase unu de toa sospecha si va tolos díes a misa, como paez dicir el Dean?

Entovía nada se sabe d'aquel millón y mediu d'euros que, fai un añu, robaron nun conventu de clausura. ¿ Dan pa tantu les llimosnes?¿ Cuantes perres tien la ilesia nel calcetu ?

Por ciertu la foto nun ye de coña, Bankia instaló caxeros nes ilesies pa recoyer les llimosnes.

Del Bosón de Higgs a la Pita y los Eggs

Milio Mariño

Dicen los científicos que si nun somos a entender lo que ye'l Bosón de Higgs, que nun tenemos por qué preocupanos nin turniar por una paré. Al paecer, tamién-y pasaba a Einstein. Lo cuál dexame más tranquilu, sobre too depués de qu'un físicu del copón dixera que pa nos, los que'n física tamos pez, la esplicación resumíase en que ye más fácil mover una pelota qu'un armariu.

Yo, por min, ta de sobra esplicáu. Nun paga'l tiru que nos compliquemos la vida col bosón el fermión y otres faraguyes d'esi calter. A la fin, lo que traten nun ye nada nuevu, ye lo que veníen tratando va cuantayá: si foi primeru la pita o los eggs.

España cederá Cantabria a la Marina Australiana

Milio Mariño

Tranquilos, nun vos tiréis al monte, que nun ye la Comunidá del expresidente Revilla ye un barcu d'Aprovisionamientu y Combate, el más modernu l'armada española.

L’alcuerdu de cesión, que ye por un añu, contempla qu'Australia pague’l gas-oíl, el mantenimientu y les dietes, mientres qu'España pagará los sueldos de los 180 tripulantes.

El xefe de l’Armada, l’almirante Rebollo, dixo que yera una solución imaxinativa p'aforrar perres ensin perder soberanía. Nun trescendió si, dientro d’esti plan d’aforru, piensen ceder La Lexón a Marruecos y quedanos nosotros con un cabu y la cabra.

Mialma nun soi pa imaxinar si estu lo llega a facer Zapateru, vixen de Cuadonga lo que diría la drechona.

Rajoy gastó 1.488.570 euros en botes de fumu, 100 veces más que Zapatero

Milio Mariño

Una de les primeres decisiones de Rajoy, y del del Ministru del Interior Jorge Fernández, foi gastar 1.488.570 euros en botes de fumu y gases llacrimoxenos, destinaos a les fuerces y cuerpos de seguridá del Estáu. Llama l’atención el datu porque, pol mesmu conceutu, Zapatero gastó, en 2007, 143.750 euros, 100 veces menos.

Lo que se diz nun ye que l’oyéramos nel chigre, ta publicáu nel BOE con too luxu de detalles. La xustificación, al paecer, foi que viendo lo que, alló pol mes d’avientu, socedía en Grecia, el ministru creyía qu’equí podía soceder otru tantu.

Ta bien ser previsor, anque claro, si Rajoy tratare a la Sanidá y la Enseñanza cola mesma previsión y xenerosidá qu’aplicó a la compra de botes de fumu igual nos diba meyor a toos.

Güei xuega España

Milio Mariño

Güei baxen los biquinis y los sombreros y xuben la lluz, el gas, el pagu poles recetes y milenta coses más. Vamos perdiendo diez cero y el partíu, que va tiempu qu'entamó, naide sabe cuando acabará. La patronal de los Bancos fialo a llargu plazu y por si entovía nun demostraren bastante que nos traten peor qu'al ganáu piden que nos rebaxen los sueldos durante diez años más.

Güei España ta en Kiev y Asturies en Villalpando, a mediu camín de Madrid pa los que viaxen en ALSA o a pie, que somos la mayoría. Los otros, los que tan más arriba viaxen toos en avión, de mou que tantu yos da que faiga fríu que calor.