Facer los meses más pequeños pue que seya la solución

Milio Mariño

En Samoa güei ye sábadu. Quitaron el vienres porque, pal comercio y la economía, cuadraba meyor asina. Yá ven que fácil. Y equí dándo-y vueltes a si recorten de la manga o les perneres. Con metéi una tayada al tiempu a tomar pol sacu la carga lleña. Si los meses tuvieren 20 díes viviríemos muncho meyor. Quitábennos l'aforfugo de llegar al 31 afogaos. Pero, pa eso, hai que tener imaxinación y estos, polo que se ve, tan apalominaos.

Cuentín de Navidá

Milio Mariño

Había una vez un Rei, d'un país remotu, que descubrió que'l xenru, el rapaz que taba casáu cola so fía pequeña, caciplaba en asuntos puercos, con cuenta facese aínda más ricu. Y entós, en llugar de denuncialo a la xusticia, mándolo pa casa dios. Lo cuál foi mui agradecíu polos diputaos d'aquel país, qu'aplaudieron a rabiar la honradez del monarca y ficieron que'l Rei casi rompiera a llorar.

Les ñarres de Pachu Cascos

Milio Mariño

Asina, con dos pares y un repuelgo nel papu, solventó Pachu Cascos la xirigoncia que xorrecía nel so Gobiernu a propósitu de por onde diben tirar depués de les navidaes y d'equí a que llegue'l branu.
Nin Maura, nin Azaña nin Xovellanos, la nuestra ideoloxía política ye'l motor de cuatru tiempos: aspiración, compresión, esplosión y escape. De mou que carretera y manta, nun quiero una pallabra. Si oigo refolgar a Crabifosse o Vallaure garro una verdiasca de blima y afalágovos poles pates hasta la cumal del Naranco.

Mariano cayó del Guindo

Milio Mariño

Yá sé que ye un chiste fácil. Pero… ¿Qué queréis? pónenlo tan a güevu qu'unu nun resiste la tentación.
Acaben cayer del guindu con tol equipu. Agora, depués de meter la papeleta na urna, resulta que yera mentira, como barruntábemos, que pol fechu de poner a Rajoy de presidente la cosa diba meyorar un montón.
Yá lo reconocieron el mesmu día que ganaron les elecciones pero amestaron una novedá. Nosotros vamos llamar al pan, pan y al vinu, vinu.
Volvieron a engañanos porque Luis, el ministru, yá ta dando vueltes pa llamar al pan, pain, y al vinu… frutu amargu de la mala uva que vendimiaron los bancos.

Unos caen del caballu y otros nun se baxen del pollín

Milio Mariño

Diz Carmina, La Chacón, y los que van con ella en procesión, qu'hai muncho por facer. Mialma que si, hai una montón maleza que pide que la sieguen nun biribí. Llueu yá se verá si merez la pena lo que xorrez o hai qu'arar y cuchar pa volver semar otra vez.
Estaya hai a embute, lo malu qu'en llugar d'arremangase anden escarabayando a lo fatu pa llueu firmar embaxo. Esi ye'l quiz, que tolos qu'anden firmando papeles tan, al empar, fuera bolos: Unos porque acaben caer del caballu y otros por que nun se baxen del pollín.

Vergoña tenía que date, Marcelín

Milio Mariño

Marcelín el de Careñes, esi que foi entrenador del Sporting y agora entrena al Sevilla, quedó como la gocha Antona. Qué digo como la gocha, muncho peor porque non se-y ocurre a naide dicir, como dixisti ayer, que'l presidente del Sevilla, un puntu al qu'acaben de condenar a siete años y mediu de cárcel por estafador y tramposu, cuenta cola to comprensión y tol to apoyu.
Vaya exemplu d'entrenador deportivu. En llugar de Marcelín vamos tener que llamate Morzonin, fiedes que tira pa atrás.

Mala collecha de Cestes de Navidá

Milio Mariño

Coles Cestes de Navidá pasa lo contrariu que coles mazanes, que nos años impares ye cuando se dan les meyores colleches. Pa les Cestes esti ye un añu de vecería. Un añu nel que les Cestes son poques y van algamar, namás, pa cuatro privilexaos que, al contrariu d'otros años, van cuidase d'enseñales pol aquello de qué dirán.

Dígolo porque, tal como tan les coses, paezme un deber ciudadanu denunciar toles Cestes que veamos. Denunciales pola via rápida y si lleven xamón Joselito o 5 J, llamar direutamente al 112.

Centru Cultural Llamberuzu (Antiguu Niemeyer)

Milio Mariño

Tengo entendíu qu'asina, llamberuzu, yera como los neños de L'Arena llamaben al carambelu redondu con mango de palu. Ye una ideya pa los de Foro Asturies, por si nun saben como llamar al Niemeyer d'Avilés, un carambelu que garraron pol palu y lleven llambiéndolo va medio añu, ensin sacái sostancia nin gustu denguno.

Ehí ta la cosa. Por eso atesteren, ensin ton nin son, cola esculpa de que, como entá nun-y atoparon sabor, quieren auditalo por ver si ye de fresa o llimón.

Llagostinos de Navidá

Milio Mariño

Camps, Cayetano d'Irujo y Urdangarin yeren tres llagostinos protexíos pol xelu de la blanca y fría impunidá. Los tres taben conxelaos y los tres remanecieron, agora por Navidá, enriba d'una plancha qu'aticen con papel de periódicu.
Tres son pocos, nel arcón hai munchos más. Naguo por oyír el discursu Real. El de verdá, unu que me llene d'arguyu y satisfaición.

Horror alministrativu

Milio Mariño

Un paisanu que mató a la muyer, de diez puñalaes de cuchiellu, taba cobrando una pensión por viudu, de casi 600 euros, dende diba cuatro años. La esplicación que dieron a la familia de la vitima foi que fuere un error alministrativu.

Que me perdonen los funcionarios de visera y manguitu pero, nesti casu, nun foi un error, foi un horror, qu'abulta paecíu pero ye bien distintu.

¿Por qué misteriu informáticu funcionarán meyor los ordenadores del Ministeriu de Facienda que los de Xusticia ? Prestaríame sabelo.

El corte inglés

Milio Mariño

Esta nueche pasada, depués d'una bona cena y mentanto fumaben un puru, Cameron dixo-y a Sarkozy que vistu como taba la cosa, y dau que non yos garantizaben un ris, yera meyor que los ingleses siguieren, tal como diben, pol so camín.

Tira que llibres, Colás; cuenten que dixo l'inglés. Asina de claro, con dos tolanos qué, amás de bien puestos y pegaos al cursu, debe tenelos, de grandes, como un balón Tangu d'esos qu'usen nel fútbol.

José Luís I d'Alemania y V d'España.

Milio Mariño

La noticia de güei, que salió ayeri, ye que nun sabíemos lo que teníemos en casa. Nun sabíemos qu'a José Luís (*) apondérenlo tanto por ehí afuera que van proponelo pa que lo nomen rei del recorte. Xubirá al tronu como José Luis I d'Alemania y V d'España. Quintu de recluta, de soldáu rasu qu'obedez, ensin rechistar, lo que-y manden la sarxentu alemana y el cabu furriel francés.

(*) Pa los que nun ten mui puestos nel idioma Asturianu convién esclariar que José Luís ye José Luis – non Xosé Lluis nin Pin - equí y na China Nacionaliega.

Poques lluces y denguna de colorinos

Milio Mariño

Soi un pocu pollín pero vamos ver una cosa: ¿Qué ye que la crisis vieno a resultes de que los Ayuntamientos punxeren bombiélles de colorinos agora pol nadal ? ¿Foi por eso polo que tamos asina ?
¿Ah, non? Pos entós, si sigo oyendo más esculpes y babayaes nesi sentíu van cruzáseme los cables y voi soltar la mano vuelta qu'a dalgunu van quedái les oreyes como dos pimientos del piquillu. Avisu pa conceyales y demás cafarnaya.

Llarimes de cocodrilu

Milio Mariño

Ver a la ministra italiana llorando ye cosa de risa. Ye pa dai con una verdiasca de blima pa que llore por dalgo porque si lo que-y pidía'l cuerpu yera nun plizcar a los probes, que plizcare a los ricos.
Son llarimes de cocodrilu que, como tol mundu sabe, hidraten los güeyos con un llíquidu que supuren cuando tan fuera del mediu. Nesti casu del conseyu de Ministros.

El Gobiernu en puntu muertu

Milio Mariño

Debe ser mui difícil tar quince díes en puntu muertu. En funciones pero ensin funcionar, col motor arrancáu y la pata quieta. Lloñe del acelerador y l'embrague y dispuesta a pisar el frenu de les babayaes. Frenu que naide pisó cuando fixeron esa recomendación a Rajoy pa que saque a Franco d'aú ta y lo entierre, pa siempre, onde tien que tar.
Si lo dixeren de coña, recomendáu polos humoristes del club de la Comedia, podía tener un pase. Lo malu ye que lo dixeron en seriu.

Rajoy y el Real Madrid

Milio Mariño

Mialma paez que la política y el fútbol van xoncíos al mesmu carru del destín. Quiero dicir que, por dalguna regla de tres, Rajoy ye al Real Madrid lo que Zapatero al Barsa culé. Ehí tan los resultaos d'uno y otru y el sitiu onde, güei, asitien los dos equipos de fútbol.
Quién sabe, a lo meyor la rellación causa efeutu ye d'un aquello que nun conociemos nin imaxinábemos tampoco. Los que nun somos madrilanos nin de Rajoy tendremos que preparanos pa lo peor

Vuelve'l pollín al trigu

Milio Mariño

Equí y en otros países d'Europa vuelve'l pollín al trigu. Volvemos dar el Gobiernu a los que dicíen que lo qu'había que facer yera desregular el mercáu llaboral, el financieru, lliberar el suelu, baxar los impuestos y al que dios y la de que lo bendiga San Pedru.
Por culpa d'aquello tamos llevando hosties hasta velo y dexalo, pero nun escarmamos. Tenemos-y menos mieu a lo malu conocíu qu'a lo bono por conocer. Mialma tamos acoyonaos. Y la xuventú entovía más.

El Foro que quixo ser faru ye llinterna barato

Milio Mariño

El Foro que quixo ser faru ta resultando llinterna barato. Llinterna de romería a la que se-y acaba la pila que Cascos compró nesi bazar de chinos que tienen Sidru y Ovidio na cai Pedregal d'Uviéu.
El resultáu ye que caminen a ciegues, tropiecen y sapien dándose focicazos como'l d'esa probe que, depués del sapiazu, entamó a dicir porcayaes.

El Niemeyer pal Real Madrid

Milio Mariño

Que les Peñes del Real Madrid, en Asturies, vayan reunise, el 3 d'avientu, nel Niemeyer ye un acontecimientu cultural que me dexa plasmáu y pamestu. Y plasmaré más entovía cuando conoza les ponencies y los temes que van tratar nesi alcuentru. Buenu y si llogren que Mouriño aperie conferencia o seya ponente entós si que diba dame un orgasmu ensucho y diba chispiar, polos güeyos, chiribines de colorinos.

De vente a vente y toi onde taba

Milio Mariño

¡ Qué tiempos aquellos ! Esti qu'escribe yera un chaval cuando desenchufaron al ditador de la máquina que lo regaba de sangre dende'l pescuezu a los pies, dexando'l celebru ensucho. Güei, trenta y seis años depués, volveremos a unu que vien ser Arias Navarro con barba buxo y pelu tiñíu de roxo.

El Pavu Real

Milio Mariño

Güei camienten los periódicos que ta teniendo más repercusión, a nivel mediáticu y popular, el casu d'Urdangarin que les eleciones de mañana. Sedrá, imaxino yo, que vamos camín de la navidá, d'ehi que tol mundu fale del Pavu Real.

Pilotu fatu

Milio Mariño

Si un pilotu queda trancáu nel water, y nun atina a dar vuelta a la tarabica, ye pa pensar si, daveres, tará capacitáu pa pilotar un avión. Pa min que non. Y, entovia tan peor los qu'en cuenta llamálo zoquete creyeron que podía ser un ataque terrorista y punxeron en pie de guerra dos aviones de combate.

ETA; dicir lo que callamos

Milio Mariño

Podemos dicir que'l comunicáu d'ETA ye pocu, nun ye nada, vuelven a tomanos el pelu, esperábemos otra cosa, nun foi lo que quería Batasuna… Podemos facer milenta valoraciones pero, entovía, nun vi que naide dixera lo que, pa min, tien muncha importancia: hasta onde taríemos dispuestos a llegar nel tratu. Quiero dicir que dixera lo que callamos.

¿ Qué callamos ? Buenu pues que, queramos o non, tratu: agora, mañana o dientro seis años, va tener qu'habelo. Nun sedrá pol aquello la independencia o por averar Navarra al País Vascu, pero hai dos coses que tan ehí y habrá que poneles enriba la mesa. Una, qué va pasar colos presos. Y, otra, a qué van dedicase los que, hasta la fecha, trabayaben de terroristes.

Gustarános más o gustarános menos pero pasará lo que yá pasó en milenta sitios. Eso de que, lo únicu que puen esperar ye la rindición ensin condiciones, vamos dexalo pa prau. A la fin, esti Gobiernu, o el qué seya, acabará faciendo un tratu.