Camino, el polesu, ye'l rei de los obispos

Milio Mariño

Da gloria ver lo llistu que ye Caminin el polesu. No tocante a tracamundiar y dar vuelta a les coses nun hai otru que-y ponga'l pie delantre. Basta ver como se defendió panza arriba y salió pola tanxente cuando-y entrugaron si, los Obispos, tamién diben escomulgar al Rei por firmar la llei del albortu.

“ Que'l Rei tenga que sancionar cola so firma una llei ye una situación única. Nun ahí otru que pase por esi trance. De moldu que nun podemos aplicar los principios xenerales a lo que ye una situación única”.

Convidame a esi paisanu. Venga, yá tais poniendo-y otra botellina sidra o lo que quiera beber que lo que nun se-y ocurra a él nun se-y ocurre nin al qu'asó la mantega. Y, enriba dixo que, si quixera, podía escribir cuatro llibros sobre esi tema.

Esti polesu ye mundial. Esti garra lo d'esi cura de Toledo qu'andaba por ehí en calzonciellos, ofreciéndose de putu, y ye capaz de facenos creyer que lo facia por penitencia y pol aquello de ganase'l cielu a pulsu.

Morrer por enquivocación

Milio Mariño

Güei, mentes tomaba'l primer cafetín de la mañana y echaba una güeyada por Internet, atopéme con otra estrapallada de civiles muertos, ventiún al paecer, por otra enquivocación de la OTAN. Nun sé cuantos enquivocos dirán, nun tengo humor pa cuntalos.
Morrer ye bien ciertu que toos tenemos que morrer, pero morrer asina… Poles bales y les bombes que disparen los amigos.
Los americanos xustifiquen la nueva ofensiva, 150.000 soldaos, diciendo que lo que quieren ye ganar puntos cola población nativa. Y, pa llogralo, amás de bombes, bales, cañonazos y estopa a dar por un tubu, dicen que piensen dayos dellos susidios como ya ficieren en Iraq cola minoría xuni. Unos cuantos dólares al mes, a repartir pa ca tribu, pa que nun sigan apoyando a los talibanes.
Ye como pa mexar y nun echar nin gota. A estes altures nun creo que naide sepa que facemos ellí porque lo que se cuez en Afganistán nun ye'l terrorismu o la paz mundial, ye una reciella ente criminales y narcotraficantes por algamar el poder. Eso y los intereses americanos pol repartu estratéxicu d'una zona d'influyencia que disputen a China y Rusia.

Emporcar el Poder Xudicial

Qué queréis que vos diga. Si Margaritina, fundadora de Xueces pa la Democracia, presume de colocar a 18 collacios, que nun fairán los otros sayones qu'anden al rau. Caún colocará a tolos qu'atrope. Tamos guapos. Nun ye que me choque, a min de los xueces chocame pocu. Tuvi bastante tratu con dellos y, mialma, algama pa escribir un llibru de babayaes, maníes, petites y vares de midir, según l'humor que tengan y quien seya'l que ta nel bancu.

Ya dixi, d'estos chocame bastante pocu pero que la presidenta presuma, al altu la lleva, de colocar a los amigos, tien güevos la carga lleña.

Oru molíu

Na paxina que tengo abierta en facebook vien apaeciendo, dende va unos díes, un anunciu que diz : invierta 100 euros en oru y gane 1.000 nun día. Entá nun-y fici casu. Nin lo fici nin pienso face-ylo. Y nun ye que me sobren les perres… Ye que soi caprichosu. A min empobínenme pola drecha y colo pola manzorga. Y, otra cosa, vaya tolanos que tien el rapaz que punxo esi anunciu. En cuenta callar y tar dai que te piego invirtiendo montoninos de 100 euros y ganando una millonada, tien l'aquello de cuntalo na rede pa que tol mundu s'entere. Entovía queda xente con bonos sentimientos y un altruísmu que mialma me dexa plasmáu. Plasmáu y roxu de vergoña porque yo, la verdá seya dicha, si paño un choyu d'esos non-y lo cuento nin a mariasantisima.