Acabóse'l cuentu de lluz y taquígrafos

Milio Mariño
La crisis arrampla con too, hasta con aquello de lluz y taquígrafos. La lluz vuelve a xubir dexándonos a dos veles y los taquígrafos tienen traza de que van faceyos un ERE, non los necesiten, nun interesa que tomen nota del dineru puercu nin de cómo foi que lo ficieron.
Bones recetes pa salir del pozu. Despidu llibre, más impuestos pal probe y premiu pal delincuente económicu. La cuenta pa que, enriba, nos pidan qu'emburriemos arimando'l costazu.

La Güelgona nun foi Güelguina

Milio Mariño

Como barrunté, va tiempu, pal Gobiernu, los Empresarios y poder establecíu, la Güelgona foi Güelguina y pa dellos nun llegó siquiera a eso. Amás remataron la xugada colo de siempre, col cantar de los piquetes, un canciu vieyu que, El Roto, como aveza a facer de cutiu, retrata meyor que naide metiendo'l deu nel güeyu.
Lo que toca, agora, ye comenos la moral diciendo que nun valió pa nada. Pa dalgo valdría, sinón nun diríen tantes mentires nin yos quedaría la cara de plasmu al ver que la xente nun traga, la xente gomita les melecines que receten contra la crisis.

Na Güelgona igual hai más vieyos que xóvenes

Milio Mariño

Imaxino que llegará'l día que van cansar, pero los vieyos entá espatexen y protesten más que los xóvenes. La foto ye de una muyerina que, l'añu pasáu, participó na manifestación que los Sindicatos ficieron en París,depués de la Fuelga Xeneral. Impresiona ver a esa muyer con un cartelo,

que pola traza fexo ella mesma, nel que debuxa a una neña y una vieya que dicen una a la otra: A la to edá yá trabayaba. A la mio edá tu trabayarás entovia.

El pautu ente, El Tíu la Vara y la Vieya'l Visillu

Milio Mariño

Eso sedría si, como anuncien, se ponen d'alcuerdo Cherines y Pachu, sedria'l descoyonu a bocadielles y espumarayos, la risión del mundu. La calificación d'Asturies no más fonderu del pozu. El barrunto de nueves eleiciones en agostu.Vaya tropa El Tíu la Vara y la Vieya'l Visillu, vaya gobiernu d'esculibiertos.

El día 29 voi tirame a la Bartola

Milio Mariño

Dicho asina igual non lo entiende tol mundu. Traduzo porque sinón puen cayeme coscoyazos y morraes hasta nel cielu la boca. La Bartola nun ye denguna muyer seronda que tenga ente ceya y ceya. Ye una frase refería a San Bartuelo, que la xente avezaba a celebrar, panza arriba, cuando acababa de recoyer la collecha y enantes de qu'entamara la vendimia.

Los ateos tienen prohibíu salir en procesión

Milio Mariño


Esta Selmana Santa nun va haber, tampoco, procesión atea en Madrid. La Delegación del Gobiernu prohibió la procesión que solicitaren pal Xueves Santu, baxu'l llema Nengún privilexu pa les Ilesies, de los mios impuestos a les ilesies cero, pola so evidente voluntá de provocación.
La prohibición basase nos informes emitíos pol Conceyu de Madrid, la Xefatura de Policía, y l'Abogacía del Estáu. Al paecer namás pueden provocar, nes procesiones, nos púlpitos y onde yos de pola gana, los que, según ellos falen en nome de Dios

Les mosques enfílense si nun futien

Milio Mariño

Cada vez almiro más a los que se piesllen nun llaboratoriu y, ayenos al mundu, afayen los secretos de la vida. A les fazañes de la mosca del vinagre tenemos qu'amestar, agora, los vicios de la mosca coyonera. Que, al decir de los científicos, cuando nun pue xingar en forma da-y por dase a la bebida. Un afayo interesante, nun momentu oportunu, pos pon en solfa a los que xustifiquen los retayos n'investigación asistía.

Asina ta'l mundu compañerinos

Milio Mariño

El patrimoniu personal de los 70 delegaos más ricos de l'Asamblea Nacional Popular, l'órganu supremu del Estáu Chinu, formáu namás por miembros del Partíu Comunista, algamó en 2011 los 90.000 millones de dólares. Cifra que choca col ingresu promediu per habitante, qu'en China ye de 4.200 dólares al añu.
P'asistir a les sos xuntes nel Gran Palaciu del Pueblu, na plaza Tiananmen, al paecer ye corriente que los diputaos y diputaes lleven traxes, vistíos y complementos d'Emilio Pucci, Louis Vuitton, Burberry, Gucci, etc, etc.

Metese a cura vuelve ser una oportunidá pa solventar la vida.

Milio Mariño

Progresamos que fai fumu. Enantes había guajes que los mandaben al seminariu pa que pudieren estudiar. Agora diz la ilesia que si los xóvenes quieren tener trabayu y comer caliente val-yos más metese a cures que facese inxenieros o deprender inglés.
Plasmu viendo como xorrecemos, pola gracia de Dios, pa desgracia de los creyentes nuna sociedá laica y más xusta.

La Güelgona del 29

Milio Mariño


La Güelgona del 29 va ser un fracasu pónganse los trabayadores y los Sindicatos como quieran ponese.
El Gobiernu, la drecha, los pijosfacha y los que nun s'enteren, o nun quieren enterase, yá conocen el resultáu, yá saben lo que va pasar. Van facer recuento de los que tengan que trabayar, polos servicios mínimos, van falar de piquetes violentos y, pa rematar la xugada, echaran mano de la policía de Madrid, que si na manifestación del domingu vio 30 onde había 300, el 29 va ver una película de terror y ciencia fición.

La ilesia sigue ensin dar un palu a l'agua.

Milio Mariño


Esperanza Aguirre acaba de pagar 123.000 euros, a una empresa, pa que faiga cosquielles a les nubes y aumenten les precipitaciones de ñeve. Un espilfarru porque podía falar con Rouco Varela pa que sacara los santos en procesión y aforrábemos una pasta. Si la ilesia nun nos echa un cable cuando lu precisamos inda entiendo menos que-y demos 10.000 millones d'euros de les arques del Estáu.

A cascala

Milio Mariño

Qu'el PP diga que les muyeres albuerten porque tienen mieu a perder el trabayu non me paez un escándalu, paezme qu'asumen parte de les consecuencies de la Reforma Llaboral. Fálta-yos asumir la otra parte, la de que tampoco pueden ser madres porque tamién les despiden. Y si a eso xuntamos que'l PP y la ilesia opónense a los anticonceutivos nun voi dicir que toca xíngase. Lo que toca ye masturbase cola mayoría que, va pocu, yos dimos.

Ciegos o chiflaos.

Milio Mariño


Nesti país, que ye'l nuestru, ta prohibíu conducir ensin cintu de seguridá pero pues torear con un güeyu y dos tolanos.
Yo, a esi toreru del parche nel güeyu, mialma que lo respeto. Respeto qu'atestere na zuna de torear porque seguramente ye lo que más-y presta pero dalguién tenia que dicíi que'l toru turnia polos dos llaos y si enantes tenia peligru agora tienlo desaxeráu.
De los que foron ver la corrida, y de l'autoridá que l'autorizó, nun voi facer comentariu. Yá me diréis vosotros.

Ye'l tafu, nun ye'l color

Milio Mariño

Prescindiendo de si son roxos o azules, el color non lo miro nin lo tomo en cuenta pa nada, noto qu'aliendo peor: güelme fatal.
Qué distintu ye l'alderique políticu n'Europa y esto que tenemos equí. Que partíu más ruin, cutre y casposu gobierna esti país. Que desfachatez que digan que son de centru drecha y se comparen cola UCD. Que dañu tán faciendo a la democracia y al exerciciu de la política, en xeneral. Nun falo de lleis nin de como xestionen la crisis, falo d'actitúes.

Tienen más cara qu'un sacu perres

Milio Mariño

Baxate'l sueldu, dexate ensin trabayu o quitate tolos drechos son afalagos que ties qu'entender pol to bien y el de los que ñacieron pa enriquecese como Dios manda. Ponete detrás d'una pancarta y reclamar una vida digna ye violencia inxustificada que lleva al caos y a la barbarie.
Nun-yos basta con ser mentirosos y sinvergüences, quieren facenos fatos dafechu y, pa más escarniu, piensen que van ser a ello.