El PP da un pasu al frente y supera los tiempos de Franco, onde había dos reválides agora va poner tres.

Milio Mariño

Dientro de pocu yá nun podré presumir, yera de los que sacaben pechu por pasar dos reválides y agora van poner tres.

Ta vistu que na Enseñanza avanzamos a too meter, 42 años depués volvemos a onde tábemos. Namás falta que volvamos, tamién, a la Formación del Espíritu Nacional. Nello ta Wert, que cambia Educación pa la Ciudadanía por Educación Cívica, pa que tol mundu s'entere de que gobierna'l PP.

Nun hai Gobiernu que nun escargate y revuelva nel Plan d'Enseñanza. Y, asina nun vamos a dengún llau. Buenu si, vamos al fracasu que ye onde nos fueron llevando y quieren volver a llevamos una vegada más.

Esti añu les rebaxes son de record: Los Olímpicos cómprenlo gratis.

Milio Mariño

Asina, con eses traces y una pareya que, como veis, sal de cara pero nun tien boca, nin güeyos nin ñarres, foi como la empresa rusa Bosco Sport presentó l'uniforme que los deportistes españoles llucirán na olimpiada de Llondres.

Mikhail Kursnirovich, que ye'l direutor de la firma, dixo que llegaren a esi diseñu depués d'un estudiu perfondu del folklore y los vezos de los españoles.

Nun sé si vos gustarán o non, lo importante, al paecer, ye que los rusos nos les regalen y tal como ta la cosa, enantes de dir comprales a Primark, foi como si nel Comité Olímpicu vieren a Dios: dixeron-yos que si a too.

Mañana yá podemos comprar llotería de nadal

Milio Mariño

Fai dos díes qu’estrenamos el branu pero, pa desfacer el muermu que nos aforfuga a toos, dalguién pensó que lo meyor yera alcordanos que, d’equí a seis meses, pue tocanos El Gordu. Mañana vienres, 29 de xuno, salen a la venta 180 millones de décimos de llotería de nadal.

Habrá quien piense que ye mui pronto, qu’entovía falta muncho. Depende como se mire. Adelantando la llotería, que se xuega el 22 de payares, tamién adelanten el día los inocentes. De mou que puen aprovechar esi viaxe pa calcanos la subía del IVA, el pagu poles recetes y otru par de recortes.

El Gordu tá difícil que nos toque pero vivir peor va tocanos, seguru, anque nun compremos décimu denguno.

El misteriu del minibar

Milio Mariño

Fartu de faceme entrugues que pue retrucar cualquiera que conoza, anque seya por altu, El Placer y el bien, de Freud, Platón o Aristóteles, entrúgome dalgo más perfondu y trescendental: ¿Por qué los minibares de los hoteles tienen el preciu que tienen?.

Nun ye pa tómalo a chancia, naide lo sabe. Nun hai caderalgu nin doctor en Harvard Business que sepa esplicar por qué una botellina con dos paraos d’agua cuesta 3 euros, una cerveza 4, un refrescu 3 o 4, y asina hasta completar la llista de los productos qu'atroquen eses neveruques qu’afayamos nos cuartos de los hoteles.

Acéutense suxerencies.

De Pajin a Mato como d'una paya a un fardu

Milio Mariño

Lo del Ministeriu de Sanidá ye pa llorar nun sé si de risa o de rabia. Si fai un añu apaeció Leire Pajin diciendo qu'usaba la pulserina máxica Power Balance, un engañabobos que lo cura too menos la falta de xaciu, agora apaez Ana Mato y, pa que non mos quede dulda denguna de que ye, entovía, más fata, faise homeópata del güeyu del cursu y recetanos fervidiellos y cataplasmes pa que nun pisemos una farmacia.

Dellos dirán que tenemos lo que merecemos pero, a pocu que merezamos, pienso qu'algama y sobra pa que la ministra, ol ministru, de Sanidá nun seyan fatos dafechu.

Tita tien que vender un cuadru pa que-y cuadren les cuentes

Milio Mariño

Esta crisis puñetera afeutanos a toos. A Tita Cervera, que inxusta ye la vida, dexóla ensin un duru. Diz que pa dir tirando tendrá que vender un cuadru, La esclusa de John Costable, que saldrá a subasta por 30 millones d’euros.

Los probes non mos damos cuenta de lo que cuesta ser ricu. Tener una casa en La Moraleja, otra en Marbella, otra más en Lugano y un Rolls Royce a la puerta mialma sal por un picu. 

A la fin, atendéi lo que vos digo, los ricos pásenlo peor que nosotros, que vivimos tan ricamente ensin eses preocupaciones.

 Probe Tita, imaxino la pena, el güelpe tremendu que tien que ser vender un cuadru por falta de perres. Acompáñola nel sentimientu.

Ca vez me repunen más esos sombreros de Ascot

Milio Mariño

Les fiestes son pa divertise. Nosotros tenemos les Piragües, San Timoteu y el Xiringüelu y los ingleses la carrera de quesos de Cooper’s Hill y los caballos en Ascot. Por esa parte ca cuál diviertese como más-y peta. Lo que me plasma ye que, añu tras añu, seya noticia que cuatro muyeres ocioses y riques a dar por un tubu, discurran dir al hipódromu con un sombreru que seya, de toos, el más ridículu.

Pocu importa que’l mundu que conocemos se te desfaciendo a pedazos, ver eses coses prestanos. Pa mi idea apláudimoslo porque sírvenos de consuelo que los ricos faigan el tontu.

En busca les mines de Mariano Rajoy

Milio Mariño

El protocolu la ONU enquivocóse y acertó presentando a Rajoy como Presidente de les Isles Salomón, que yera aú taben les famoses mines d’oru que buscaron los españoles va cuantayá. Güei les isles Salomón, según la Enciclopedia, son una monarquía parllamentaria con problemes de corrupción, déficit abondo, deforestación y malaria a dar por un tubu. Too mui paecíu a lo nuestro pues inclusu ta xubiendonos la fiebre y nun-y atopen remediu.

Baxen los ricos y xuben los probes cuando tenía que ser al revés

Milio Mariño

Dicíalo mio güelu: el mundu ta mal repartíu. Y tantu amiguinos, porque según l'estudiu d'una consultora del Royal Bank de Canadá, en malpenes un añu, el númberu de ricos baxó, en España, un 2.6 % mentanto, el de probes, xubió y sigue xubiendo que da pena velo.
Pasamos de tener 141.000 ricos en 2010, a tener namás que 137.000 a finales del añu pasáu. Por contra, el númberu de probes algama ya los 11,5 millones.
Ta vistu que, no tocante les perres, nun rixen les lleis de la física. Nun pue aplicase'l principiu de los vasos comunicantes nin la teoría d'Arquímides. Tener el bolsu vaciu nun llama dineru y sumerxir cincuenta euros na caxa del supermercáu tampoco fai qu'esperimentes un emburrión p’arriba y salgas a flote.
Naide sabe au pue tar el dineru que los ricos tuvieron y agora nun tienen, nin que foi de lo pocu que teníen los probes. Va resultar que los únicos que saquen pitanza, con esti tiberiu, son los calcetos.

Nun ye un home pequeñu, ye un neñu

Milio Mariño

Esi que vemos, ehí a la vera, ye un neñu ente munchos paisanos. Un neñu, fíu de padre mineru, que, pola cara que pon, mialma paez asustáu.

Esa ye la historia, qu'habrá quien piense qu'a los neños hai que guardalos de les coses males que pasen, de la inxusticia y les desgracies, procurando, únicamente, que xueguen y se diviertan.

Otros, en cambiu, tando d'alcuerdo en que los neños nun deben cargar con mieos y preocupaciones que nun yos correspuenden, son partidarios de nun esconder nin negayos la realidá de les coses. Entienden que deben saber por qué los padres nun aceuten lo que consideren inaceutable y por qué se sacrifiquen y lluchen defendiendo lo que consideren xustu.

Son dos postures distintes y les dos me paecen llícites. Agora bien, lo que naide negará, imaxino, ye que los neños  nun son insensibles, los neños entruguen. El quiz ye atopar el meyor retruque, el que-yos faiga entender lo que, pa ellos, nun tien sentíu.

La xubilación del canariu: ¡ Vaya páxaru !

Milio Mariño

El nuevu conseyu de la SGAE decidió ayer impugnar la pensión del que fuere cantante de Los Canarios y direutor xeneral de la Sociedá d’Autores, Teddy Bautista, qu'agora de xubiláu tien pa cobrar 23.000 euros al mes, casi cuatro millones de pesetes.

Esti páxaru, amas de dexar la SGAE con un pufu de 130 millones d'euros, ta imputáu por apropiación indebía y alministración fraudulenta.

 Nun ye novedá, ye otru más d’esa reciella lladrones que, mialma,  paez nunca s'acaba y a los que nun basta con metelos trenta años nel trullu. Hai que pone-yos, hasta que queden sordos, la canción que fexo esti puntu: Get on Your Knees.

Franco siguirá nel desván de los trastos

Milio Mariño

Por decisión del Tribunal Supremu, de fecha 13 de xuno, que nun almitió a trámite un recursu que pidía la reposición de la estatua de Franco, a caballu, na plaza San Xuan de la Cruz, xunto a los Nuevos Ministerios, el dictador siguirá nel desván de los trastos.

La noticia pue dicise que ye bona y mala al empar. Bona porque mialma sedría un escarniu que volvieren poner al gallegu nun pedestal, anque fuere de bronce y cagáu de palombes abondo. Y ye mala porque, amás de qu'hai un maxistráu de Supremu qu'emitió un voto particular en contra, plasma que conserven la estatua como si dalguién pensara que, entovía, pudiere sirvinos pa dalgo

Lluces qu'allumen lo prietu

Milio Mariño

Si una imaxen val por mil pallabres esta nun tien preciu. Dexate mudu. Ye como si, nun segundu, oyeres un discursu en silenciu. Entrate polos güeyos baxa pol pescuezu, plonia nel pechu y, a la vuelta, faite tarabica'l gargüelu.

Los mineros nun quieren regalos, quieren trabayu, quieren ganar el sueldu nel tayu. D'ehí, pa m’idea, que los que nunca sudaron pa ganalo nun entiendan que prefieran partise l'alma trabayando enantes que tar nel paru.

Rajoy volvió meter la pata hasta'l cuezu

Milio Mariño

A la fin en dalgo somos los primeros, somos el faimereyir de la prensa estranxera. Los periódicos de medio mundu falen de la rueda de prensa, obligada, de Rajoy, el domingo y pónenlo a cayer d’un burru pola inorancia, les mentires y les fanfarronaes que dixo y nun veníen a cuentu.

Rajoy ganó les eleiciones llamando fatu a Zapatero y en cinco meses tamién lo gana, de llargu, en metedures de pata y salies de pata de bancu. A lo cuál hai qu'amestar dalgo que barruntábemos y agora sabemos: que ye fuino, babayu y tien menos sentíu que la pega en rau.

Correa sal de la cárcel y Fernández Ordoñez del Bancu d’España.

Milio Mariño

Son concidencies, ye lo que tien xuntar dos noticies de les que non mos interesa'l por qué, sinón el cómo: quiero dicir si lo ficieron a riciu, al recostín o a tou correr.

Correa salió en vaqueros, ensin bigote pero con barba, con una maleta en cada mano y tres más que llevaba'l xofer. Ordoñez salió riyéndose, vistíu de traxe y corbata y llibre de polvu y paya.

Ciertu qu'aperiaben dos imáxenes bien distintes pero los dos diben contentos. Apuesto a que lleven pa casa más de lo que traxeron. Incluyíu Correa que salió de la cárcel con cinco maletes nes que ye pa barruntar que cueyen, de sobra, dos mudes y un cepiyu de dientes. Non m'estrañaría que d’equí a unos díes dixeren qu’arrampló col papel hixénicu y tres o cuatro toballes.  

Nosotros metíos nun pufu y el Presidente por ehí de buréu

Milio Mariño

Ta vistu que, mialma, nos tomen por fatos. Ayer volvieron vendenos por buenu dalgo que non lo ye. Tol mundu sabe que dengún bancu presta dineru sinón hai quien avale'l préstamu. Y, non solo eso sinón que si te presten 50, fáente qu'avales 500.

¿A quién creyéis que punxo como aval el Gobiernu pa que-y dieren los 100.000 millones d'euros? A nosotros. Nosotros somos los avalistes del pufu. Somos los que vamos pagar con sangre, sudor y llarimes lo que nun podemos pagar con dineru.

Nun contentos con eso, pa qu’entovía seya mayor l'escarniu, tenemos un Presidente que fai como’l capitán del Costa Concordia, anda por ehí de buréu mentanto se funde’l barcu.

Nun ye lo mesmu burru que pollín

Milio Mariño

Tentamos disimulalo pero la verdá ye que nos tienen acoyonaos. Foron ellos los que robaron y estafaron lo que quixeron y el mieu tenémoslo nosotros. Nosotros tamos tremando y ellos nin s'inmuten, salen pola tele riyéndose y escoyónense cada vez que’l Gobiernu nos echa mano al pescuezu,

Nun sé hasta cuando vamos siguir asina, apollinando con tolo que nos echen enriba mientres ellos van cola vara na mano diciéndonos por ónde tenemos que dir. Urxe que nos plantemos, que sacudamos el mieu y que-yos faigamos ver que la vida igual nos emburrió a ser pollinos pero burros non.

La güela, el ñetu y la barricada que xuence lo que separa'l tiempu

Milio Mariño

Aldovinase muncha tenrura nel biecu d'esi xoven mineru que tranquiliza a la muyerina que se tapa con un paragües mientres enfila camín de casa ensin que-y importe la barricada qu’afuma que mete mieu.

 Seguru que non l'asusta, seguru que tá avezada a güelgues y barricaes bastantes, incluyíes les de los años sesenta, y foi ella la que tranquilizó y dio conseyos a los rapazos, animándolos a que sigan lluchando pero teniendo cuidáu de nun mancase nin de mancar a naide.

Conseyu del Poder Xubiláu

Milio Mariño

Anque vos cueste creyelo esi de la foto, el que que ta de pie a la puerta del hotel,  soi yo, y la del coche, con sombreru, la mio muyer. Tábemos de viaxe oficial, cargábemos les factures al INSERSO y a correr. Nun tenemos qu’esplicar nada a naide, nin al Congresu nin al Xulgáu, yera too llegal. Tampoco tengo pensáu dimitir, voi siguir de xubiláu porque nun tengo conciencia de que ficiera nada malu nin al marxen de la llei. Ciertu que yera too a cuenta del Estáu… ¿ Y qué ? Pa min que lo que vos xode, de verdá, ye que fuéremos a esi hotel y non a un hostal de Benidorm.

¿A qué xuega Botín?

Milio Mariño

¿A qué xuega Botín...?¿Xuega na roxa, sustituyendo a Villa, quier dicinos que va dexanos en calzonciellos, acaba salir del infiernu, ye un guaje qu’entovía cree nos reis, o montó esta comedia celosu de que falemos de Rato y non nos fixemos en él?

Cazar mineros ye más fácil que cazar perdices

Milio Mariño

El pueblu llanu ye ciertu que tira al monte, pero aveza a ser más botánicu que animal rencorosu. Siéntese cómodu mecíu ente la naturaleza y a ella recurre cuando se ve perdíu o güel el peligru.

 Nun siempre ye bon refuxu porque, como se pue ver na semeya, los depredadores acesmen en cualesquier parte y ponen n'evidencia que cazar un mineru  ye abondo más fácil que cazar perdices. Los mineros tienen por zuna d'andar en bandaes pero nun son a volar casi nunca. De mou que pue cazalos cualquiera que tenga una bona escopeta y nun tenga conciencia de que se tiren al monte pa salvar el pelleyu. 

Rajoy entra con tou y comete falta de tarxeta.

Milio Mariño

Rajoy pidi-y a la Selección de fútbol que gane la Eurocopa pa que los españoles puean tener, siquiera, una pequeña allegría y Del Bosque respuénde-y que ganar nun ye la solución pa España.

 Bien pol seleicionador que supo poner al Presidente en so sitiu y lliberar a los xugadores, y a él mesmu, d'una responsabilidá que nun tienen.

 Cualisquiera, por tontu que sía, sabe que les allegríes que puea danos el fútbol nun van compensar la murnia que semó esti Gobiernu, empeñáu en machucanos pa que los poderosos puedan siguir sonriendo.

El furacu de la Xusticia ye mayor que'l de Bankia

Milio Mariño

Lo que socede nesti país ye pa pensar si non nos daría un aire y taremos infestaos pol virus de la tontura, pues les instituciones, entamando pola Xusticia,  mialma paez qu'atontecieron toes a un tiempu y engárrense por ver cuála fai la mayor fatada.

Nun cueye pensar otra cosa a tenor de lo que-y pasó al mineru del Pozu Maria Lluisa, José Emilio Fernández, que detuviéronlo fai dos díes, cuando la manifestación en Madrid, y salió ayer en llibertá, con cargos, depués de prestar declaración y de que los Sindicatos y los abogaos ficieren milenta xestiones.

 Nun queríen dexalo salir. La fiscalía acusalo de terrorismu y tenía solicitáu, pa él, prisión incondicional ensin fianza.

Qu'un fiscal acuse a esti rapaz de terrorista ye una preba más de que la Xusticia, nesti país, perdió'l norte y navega, ensin rumbu, en manes del fatu de turnu.

Hai que dinamitar el celebru y protestar con más xeitu

Milio Mariño

Yá nun ye noticia que 8.000 mineros vayan a Madrid, a manifestase delantre del Ministeriu d'Industria, y la policía reparta estopa como nos años setenta.

 Los periódicos de la capital malpenes lo mencionen. De mou qu'el oxetivu de llamar l'atención y poner a la sociedá al tantu del problema nun se llogró. Los mineros volvieron pa casa con más rabia y frustación y el cuerpu tunyíu de toletazos.

Protestar claro que ye necesariu, ye imprescindible, pero hai que dinamitar el celebru y discurrir otres formes de facelo que nun seya enfrentase a la policía a pechu descubiertu. Eso nun val nin pa desafoganos. Asina lo únicu que consiguimos ye que nos frayen a guelpes y llueu presuman de que nun podemos con ellos.