Mientres Rajoy bailla samba con Merkel en Brasil convoquen un referéndum

Milio Mariño

Tamos tan avezaos a políticos corruptos, ineficaces y cínicos que lo qu'acaba de facer Dilma Rousseff, Presidenta de Brasil y del Partíu de los Trabayadores, paeznos insólitu. La cai pidía-y meyores nos servicios públicos, la educación, la sanidá y ante la corrupción, y Dilma fexo-y casu, ufiertó cinco grandes pautos que suponíen una reforma, a xeitu, de la Constitución.

El casu que la oposición, parte del poder xudicial y los grandes medios de Brasil, la derechona de siempre, echáronse-y enriba alegando que yera imposible ya innecesariu convocar una Asamblea constituyente, porque una vegada que se convoca tien plenos poderes pa camudar la Constitución de riba a embaxo.

Pero Dilma nun s'engurrió, rectificó sobre la marcha. En cuenta impulsar l'Asamblea constituyente, va promover un referéndum pa que'l pueblu vote direutamente les midíes de la reforma política. Y va facelo antes d'ochobre, pa que les midíes entren a vigor en 2014.

Claro qu'eso asocede en Brasil, un país tan atrasáu qu'inda tien en cuenta'l sentir de la xente y convócala pa que vote les lleis.