Esti branu, equí n'España, munchos neños pasarán fame

Milio Mariño

En contra de los demás grupos parlamentarios y faciendo usu de la so mayoría absoluta, el PP retrasó, ayer, seis meses la posibilidá d'aplicar un plan urxente contra la probitú infantil. Un Plan que nun vaigan creyer diba destináu a la India o África, yera para nós, pos según la UNICEF y Save the children, un bon númberu de neños españoles pasen fame porque los sos padres nun puen alimentalos.

Perplexos ante tanta corrupción, espilfarru y sobresueldu, indignaos polo que fixeron cola educación, la sanidá y la xusticia y porque amenorgaren los salarios y vaigan amenorgar les pensiones, quiciás nun alvirtamos l'algame de lo que supón abandonar a so suerte a miles de neños que, pol zarru braniegu de los colexos, nun van poder comer lo necesario.

Al paecer, a los diputaos y diputaes del PP, tantu yos da. Calcaron el botón del NON y marcharon pa casa, colos sos traxes caros, los sos salarios y les sos dietes, ente rises y anécdotes, faciendo gala d'una ruindá moral que los incapacita pa siguir nel cargu.

Sé que me repito y, dende va tiempu, digo lo mesmo, pero tengo que volver a entrugar: ¿ Qué más tienen que facer estos impresentables pa que nos echemos a la cai?