Nega-y el saludu a Wert nun ye falta-y al respetu, ye respetase a unu mesmu

Milio Mariño

Nun-yos di la mano porque lo que tán faciendo ye una falta de respetu a nos ya la Constitución española, dixo, ayer, una moza que foi cola so camiseta verde a recoyer el Premiu Nacional fin de carrera. En total fueron dolce, de los 129 galardonaos, los que se negaron a saludar al ministru ya les autoridaes presentes.

Rematáu l'actu, Wert coló de secute y nun quixo facer declaraciones, pero dende'l PP y el Gobiernu intentaron quita-y fierru al asuntu resaltando que la protesta fuere bien minoritaria. Que fueren 12, de 129, y nun tenía importancia.

Lo peor d'esti Gobiernu yá nun son les midíes qu'adopta, ye’l despreciu y la suficiencia fata. Ye esa sorrisa cínica cola que presume y tien a gala facer lo que-y da pola gana ensin atender a conseyos nin a protesta denguna.

Al PP paecerán-y pocos pero a mi paécenme munchos que 12 Premios fin de carrera nun quieran da-y la mano al ministru.