Los ricos aprueben con un cincu

Milio Mariño

Siempre foi asina: los ricos aprueben con un 5, o inclusive con menos, mentes que los probes precisen un 6,5 y d'ehí pa enriba. Si nun saquen meyor nota val más qu'estudien pa fontaneros que ye la meyor carrera a la que puen aspirar los de la clase de tropa.

Asina foi tola vida, pero díxolo Wert y armóse la marimorena. Nun sé por qué. Nun entiendo a qué vien tantu escándalu. Toos sabíamos que los probes, p'aprobar, precisen, a lo menos, puntu y mediu más que los ricos y, con tou, entá nun ta claro que-yos mereza la pena dir a la universidá.

Esplicárennos el cuentu aquel d'un pastor xoven, probe y desvalíu, llamáu David, que con un gomeru y cuatro piedres, frayare al xigante Goliat. Pero, como nun podía ser d'otra manera, asocedió al aviesu. La piedra apenes-y fixo un rascuñu y cuando Goliat espabiló de la sorpresa, solmeno-y tal paliza que lu dexó tiesu.

Agradezo al ministru Wert que dixera lo que dixo. Había, y hai, xente qu'inda cree que la conciencia de clase ye un conceutu absurdu, una teoría fata que foi invalidada pol progresu a mediaos del sieglu venti.