Marcador simultaneu: Rajoy – Rubalcaba, X

Milio Mariño

Tenía pensáu escribir d'otra cosa. Nun sé de qué, pero en concencia nada rellacionáu cola política. Los pocos qu'inda me lleéis imaxino que yá taréis fartos de qu'aportune cola mesma tontura. Yo tamién lu toi, toi hasta los mesmos de davos la vara cola corrupción, la vuelta del fascismu y les metedures de pata d'un Gobiernu que dende'l presidente al postreru de los sos ministros y ministres seríen menos dañibles si se dieren a la bebía que faciendo lleis.

La cosa foi que lleí que Rajoy y Rubalcaba llegaren, per teléfonu, a nun sé qu'alcuerdu que va presentar el Gobiernu n'Europa y nun pudi conteneme. Mamina del alma, un alcuerdu d'Estáu fecho por teléfonu… ¿Nun podíen quedar anque fora nun chinu y falalo?

Dándo-y vueltes, llegué a la conclusión de que tuvo que ser un alcuerdu simultaneu. Esto ye, que caún taba d'alcuerdu consigo mesmu y los dos al empar. Lo cuál nun significa, como pretenden faenos creer, que tuvieren d'alcuerdu ente ellos. La sincronía nun implica causalidá, de cuenta qu'unu pudo dicir sí y l'otru que si quies arroz Catalina. Eso debió ser.