Sigue lloviendo y yá nos quiten hasta’l paragües de les pensiones

Milio Mariño

Suel dicise que nunca llueve a gustu de toos pero llevamos una racha que llueve a gustu de nengunu. Por eso que'l gatu qu'apaez na semeya, nun ta murniu y azul ta hasta los coyones de que llueva en xineru, febreru, marzu… abril, mayu y xunu.

Hai quien lu achaca al calentamientu del planeta o al cambéu climáticu pero yo achácolo al Gobiernu, que nos metió nel iviernu y anuncia que nun tienen cuenta de sacanos mientres ellos tean al mandu. La prueba ye como amaneció güei, dempués qu'ayer apurrieren el so informe los espertos y salvu UGT toos tuvieren d'alcuerdu. Hasta Comisiones Obreres, manda caláu, ve bien que nos sotripen otru pensionazu y vaigan más allá de conxelanos el sueldu.

La solución que proponen ye como si nos cuntaren un chiste malu, mientres nos pon pingando un bastiáu. Dicen que, pa que les pensiones nun baxen nel futuru, lo qu'hai que facer ye baxales agora, yá mesmu.

Sigue lloviendo y lo qu'anuncia l'home del tiempu ye que si nun par d’iviernos non muerres de pulmonía, fadrán que muerras de fame.