Allabáu sía'l FMI y la madre que lu parió

Milio Mariño

A cualesquiera que-y entruguen si se considera fatu la respuesta nunca podrá ser oxetiva. En principiu, naide piensa que lo ye. Pero depués, cuando nos alcordamos de Freud y el llau foscu del subconsciente, dámosnos cuenta de que la realidá ye casi siempre lo que nos paez que nun tien sentíu. Y, entós surde la dulda. Nun pue ser, pensamos, que les autoridaes y los altos organismos tean toos enquivocaos y, namás, nós temos no cierto.

Ayeri, por exemplu, sufrí otru ataque d'estos oyendo lo que diz el Fondu Monetariu Internacional, que pide que s'abarate'l despidu y baxen más los sueldos pa poder salir de la crisis. Tou foi oyelo y pensar que ye una barbaridá. Pero de xuru qu'hai que ser bien fatu, mui tontu mui tontu, pa nun dase cuenta de qu'esa ye la solución.

Tamién me paez absurdu que, según los datos qu'acaben de publicar, el númberu de ricos, en 2012, aumentara un seis per cientu. Cosa que, al paecer, ye de lo más normal. Asina que, puertes pa fuera, voi siguir diciendo que nun soi fatu pero per dientro cada vez toi más convencíu de que sí que lo soi.