De la FADE sal un fedor que lo güelen en ca dios

Milio Mariño

Dende la xunta direutiva de la FADE, la Federación Asturiana d'Empresarios, pidieren la dimisión del so presidente, Severino García Vigón, arriendes de que fuera imputáu por un presuntu fraude del IVA.

Depués que fuere imputáu, Severín pagó, a toca teya, los 500.000 euros que-y reclamaba Facienda, pero eso nun detién el procesu nin paraliza les dilixencies, por fraude, que tramita un xulgáu d'Uviéu.

El casu qu’ayer sometieron a votación la so continuidá y la mayoría votaron que siguiera. Debieron pensar que Severín entovía ye xoven, tien 72 años y lleva 18 al mandu de la patronal asturiana. Tamién debió influyir que dalgunos políticos del PP, como Gabino de Lorenzo, amosáron-y el so sofitu y dixeron que nun tenía por qué dimitir. Lo propiu del PP, que sabe enforma d'eses coses. Amás Vigón ye un puntal coyonudu a la hora de dicir babayaes. Nun fai muncho dixo qu'a los paraos que cobren el subsidiu de 400 euros había que ponelos a trabayar porque yá ta bien de comer a la sopa boba. Que podíen llimpiar montes y cunetes o plantar árboles.

Lo de los árboles nun ye mala idea, colos 500.000 euros que pretendía birlar al fiscu podíen plantase unos cuantos. Amás, esos árboles, seguru que llimpiaben l'atmósfera del fedor a podre que sal de la patronal asturiana.