Rosalía y Luis, una hestoria de güei

Milio Mariño

¿Cómo quies que me vista pa dir a l'Audiencia?, Luis. Entrugó Rosalía ayer, mientres almorzaben, ratificando que non solo firma, ensin mirar, lo que'lso home pon-y delantre, sinón que procura satisfacelo hasta nos mínimos detalles.

Nun sé, cualquier cosa. Esi vistíu frescu, de fueyes verdes que xuben de la ñalga a la cintura. Ten en cuenta que voi volver tarde. Tengo una reunión de trabayu d'eses que se presumen complicaes.

Rosalía yá oyera enantes esa frase. Yera la esculpa qu’avezaba a utilizar el so home p'atopase, de xuru, con Ruz, como venía faciendo los xueves dende diba yá dellos meses. Asina que fixo como si nun se diera cuenta de que teníen un lio y, mientres se cambiaba, díxo-y que nun s'escaeciera de llevar Almax porque d'aquelles reuniones de trabayu siempre volvía con ardor d'estómagu.

El vistíu de xacíu que lo punxo. Sentába-y meyor que nunca, sentíase llibre, acababa de recuperar la so individualidá. Tal ye asina que cuando güei espertó y vio que'lso home entá nun llegare a casa non lu echó, pa nada, en falta. Dalgún día tenía que suceder. De mou que, dispuesta a siguir avente, alcordó que tenía hora na peluquería y qu'aquel xuegu venía-yos bien a los dos.