El FMI almite que con Grecia pasáronse, pero la cebada al rau

Milio Mariño

Nun documentu internu, "estrictamente confidencial", al que tuvo accesu The Wall Street Journal, el FMI reconoz que subestimó el dañu que les midíes d'austeridá podíen causar na economía de Grecia. Ye más, l'informe tamién reconoz que cometieron erros importantes y que'l rescate benefició más a la Unión Europea qu'a Grecia.

En cuantu que lo publicó la prensa, la Comisión Europea y el Bancu Central, non solo alvirtieron que nun yera asina sinón qu'esixeron al FMI que matizara y añidiara les sos conclusiones.

Nin el FMI nin los otros avecen a reconocer los sos erros pero, dacuando en vez, nos documentos internos, dalgo escápase-yos.

Ye realmente un escarniu que lleven a la xente a la ruina y llueu digan que se-yos foi la mano. Pero, faigan lo que faigan, nun almiten vuelta de fueya, lo qué fixeron con Grecia ye lo que tán faciendo con España. Depués, dientro unos años, cuando nos dexen na miseria, seguro qu'apaez daquién y diz: ¡Meca! Vaya fallu, en cuenta pone-y azucre al café, púnxi-y sal. Y echarán unes rises.