Pío y Pons

Milio Mariño

Va tiempu que dexó de ser noticia que cualesquier altu cargu del PP apaeza como corruptu, cara dura o sinvergüenza pero, anque sía a manera d'inventariu, convién tomar nota de dos llebreles, Pío y Pons, que son dolicocéfalos.

Pío preside'l Senáu pero ye un inorante que naide sabe cómo ocupa esi cargu. Inoraba que tuviera que declarar a Facienda los 24.000 euros que-y dio'l so partíu. Pons, pela so parte, cobra dos veces por arriendu de vivienda y tampoco paez enterase. Inora que'l Congresu, al ser un diputáu de fora de Madrid, paga-y 1.823 euros mensuales, en conceutu de vivienda, y que'l PP paga-y 1.455 por exautamente lo mesmo.

Tampoco resulta estrañu que nun s'entere. Tengan en cuenta que va dos díes dixo, de los mozos que tienen que salir a trabayar fora d'España, que tar n'Europa ye como tar en casa.

A lo d'estos dos hubo que sumar ayeri lo de los trés primes del Rei, lo del padre de la ministra Bañez, yá fináu, otru par de chanchullos d'Urdangarin y agora nun alcuerdo qué más pero, nun s'esmolezan, siguimos pa bingu.