Norabona a Fonsu Zapico, Blimea y tola Cuenca Minera

Milio Mariño

Prestame pola vida qu'Alfonso Zapico -nacíu en Blimea en 1981- flacu, tímidu, provincianu y socialdemócrata, tou nel bon sentíu, como él mesmu se defin, sía'l ganador del Premiu Nacional del Cómic 2012, pola so obra “Dublinés”, una biografía de James Joyce.

Prestame más entovía que’l premiu, qu'en perres nun ye gran cosa (20.000 euros), llegára-y nun momentu nel que se-y acaba una beca concedía, en 2009, pola Maison des Auteurs de Angulema, Francia, que ye onde tá viviendo agora.

Diz Fonsu que'l premiu coyólu col pasu camudáu, que nun sabe si quedase en Francia o volver p’Asturies y rescatar vieyos proyeutos. Ún d’ellos sobre la revolución d’ochobre de 1934.

Fai lo que quieras, rapaz. Faigas lo que faigas toi seguru qu'a toos nos paez bien y, tamién, qu'en Blimea tarán tirando voladores por esta fazaña que demuestra que yes mundial.

Yo teníalo claro, a min non me sospriende qu'un premiu asina viniere p’Asturies de la manu d'un mozu d'equí, pero igual a dellos yos choca que la mocedá de la Cuenca Minera sepa facer más coses qu'una barricada, cuando fai falta, una fuelga o una caminada de 500 kilómetros.