El Príncipe choca la mano a quien-y la ofrecía pidiendo llimosna

Milio Mariño

Los qu'anden perhí enriba nun s'enteren de lo qu'hai pequí embaxo. Aseguren que tán al tantu de too pero viaxen na so nube y lleen lo que dicen los periódicos, de la crisis y la probitú, como si lleeren una novela.

El casu que la realidá, por muncho que dellos quieran convencenos de lo contrario, ye la que ye, y como sabe que dalgunos nun acaben de vela o la ponen en dulda, recurre a los fechos pa esclaria-y lo.

Los fechos, nesti casu, foi lo que-y pasó ayeri al Príncipe Felipe cuando salía d'un funeral na ilesia madrilana de San Francisco de Borja, que vio a una muyer cola mano estendía y creyó que yera pa saludalo pero la muyer pidía llimosna y tendía-y la mano pa que-y diere una moneda.

Avezáu a que la xente pída-y saludos y non dineru, Felipe nun lo duldó un segundu. Allongó'l so brazu, tendió la so mano y dio-y un fuerte apertón.

Cuenten que la muyer quedó plasmada viendo la reacción del Príncipe, pero correspondió, educadamente, al saludu de Felipe, que sonriente y bien satisfechu siguió'l so camín.