¿Ye Merkel la nueva Füher al mandu?

Milio Mariño

Les protestes contra la canciller alemana, Ángela Merkel, axuntaron, ayeri, a 50.000 persones na plaza del Parlamentu y n'otres cais d'Atenes, onde los manifestantes portaben pancartes que la encamentaben, n'alemán, a llargase (Merkel raus) y acusábenla de tar instaurando un cuartu Reich n'Europa.

Les comparances cola Alemaña nazi xorrecen que ye un primor. Nun paecen escabarriaes. A la xefa del Gobiernu alemán identifíquenla colos retayos impuestos pola Troika, a cuenta de les ayudes emprestaes desque empezó la crisis.

A falta d’esplicaciones creyibles, son munches les razones que lleven a pensar qu’empobinamos per un camín peligrosu. Alemaña sofitada nos Bancos, y los Bancos n'Alemaña, tán sometiendo a Europa como nunca tal se vio dende la Segunda Guerra Mundial.

Namás aguanta Gran Bretaña y, en menor midía, Francia. ¿Vuelve a repetise la hestoria camudando los cañones polos euros de la delda? ¿Tamos pasando del Fascismu armáu, al fascismu económicu, que nun mata a tiros pero amenacia y quédase cola cartera?

Lo que nos cuenten de pa qué valen los retayos ye too una trola. De momentu, namás valen pa fundinos na probitú. Y nun s'acolumbra nenguna meyora, anuncien nuevos y más duros retayos.

El Gobiernu diz que lo esixe Alemaña. Yera lo que dicía media Europa alló por 1942.