Les muyeres nun se fien d'Obama

Milio Mariño

A falta de lo que puea suplir el debate d’ayer, les encuestes que se publicaron fai dos díes, sobre la intención de votu de los estadounidenses, confirmen l'apolmonante perda del sofitu femenín del presidente Obama.

El Partíu Demócrata sigue atesterando na so apuesta polos temes sociales como l'albuertu o les polítiques anticonceutives, p'atraer el votu femenín, pero les encuestes evidencien que la principal esmolición de les muyeres nun va por esi camín, centrase na economía, el desempléu y la política esterior.

Les muyeres, según los analistes, siéntense más vulnerables económicamente porque avecen a tener menos ingresos y tán más esmolecíes pol futuru debíu a que saben que sobrevirán a los sos homes y quedarán viudes.

Los analistes tamién alcuerden que les muyeres avecen a esperar hasta l'últimu momentu pa decantar el so votu, una circunstancia que podría favorecer a Obama.

Chocame esti cambéu, de les muyeres americanes, y, entovía me choca más que seya polos motivos que dicen.

Chocame que se sientan más vulnerables y que piensen facer frente a esa vulnerabilidá votando a la derecha más reaccionaria.

Non me cuadra, asina que lo meyor va ser esperar col enfotu de que los analistes s’enquivoquen y les muyeres entren en razón y atinen. Lo contrario sedría un chascu morrocotudu.