La solución ye reiniciar l'ordenador.

Milio Mariño

A nun ser que s'espropie a los ricos, yá podremos vivir cien años que por muncho que vivamos nun vamos poder pagar la famosa y brutal delda que, dicen, tenemos por haber vivíu modestamente pero aún asina, percima de les nueses posibilidaes, pos lo nueso hubiera sío vivir na probeza, que yera d'onde veníemos y nun tendríemos nunca qu'haber salíu.

Yá pueden facenos retayos y más retayos y conderganos a la penuria perpetua, que d'onde nun hai nun pue sacase y anque la delda la herieden los nuesos fíos tampoco ellos van poder pagar esi intentu nuestru por salir de la probitú.

¿Y qué pasa si nun pagamos? Pos pasa, según los que manden y saben d’esto, que va ser peor.

Vistu lo visto yo inclínome por entamar de nuevu. Por non dicir si nin non. Por cortar diez segundos la lluz y reiniciar l'ordenador. Ye lo más fácil. Ye lo qu'indiquen tien de facese cuando esti caciplu se pon que nun hai quien faiga carrera del.