El Barcelona Real Madrid ye Palestina contra Israel

Milio Mariño

La iniciativa del Barça, de repartir 98.000 cartulines pa que los espectadores formen una xigantesca bandera catalana, qu'ocupe tol estadiu, paezme discutible y mui pocu oportuna, sobremanera si tenemos en cuenta que supón implicar al equipu nel convulsu momentu políticu que vive Cataluña.

Paezme una desaxeración simbólica que nun concuerda col espíritu y los valores d'un actu deportivu, que concierne, namás, a dos equipos profesionales que compiten nuna Lliga de fútbol.

Pero más discutible, entá, ye la zafiedá, el mal gustu y l'usu partidista que tán faciendo dellos medios de la significación que se-y quier dar al partíu.

Viéndolo dende equí, dende esti requexu asturianu, catalanes y madrilanos esbarrien a más nun poder, pero esbarria más entovía'l direutor d'El Mundu, Pedro J. Ramirez, que propón que se salude a la bandera catalana puestos en pie y al berru de: ¡ Sieg heil ¡, que yera'l saludu nazi.

Como comentariu final, asocédeme que lo meyor ye traer equí lo que dixo, en 1873, Estanislao Figueres, el primer presidente de la I República: "Señores, yá nun aguanto más, toi hasta los coyones de toos nós".