Los Príncipes de boda y los súbditos de fuelga

Milio Mariño

Güei, que ye domingu y toi de gracia, prúyeme facer crónica social, de mou que voi camentar la boda del príncipe Guillermo de Luxemburgu con la condesa Stéphanie de Lannoy. Una boda que se celebró ayeri y barrunten que va ser la última en munchos años, pero non por que s'acabe la Monarquía sinón porque yá nun queden príncipes solteros en tola rodiada d'Europa.

Los que fueron a esa boda y apaecen na semeya, anque non lo paeza, son los nuesos Felipe y Letizia. Mialma son ellos: él d'uniforme militar y una pila medayes ganaes en combate contra l'aburrición, y ella con un vistíu del diseñador Felipe Varela y un sombreru a xuegu de Pablo y Mayaya.

Dir a una boda toos sabemos que supón un esfuerciu y un taragañu nos nuesos aforros. Nesti casu nun trescendió cuál foi'l regalu que dieron, nin lo que costó'l viaxe, el traxe y el vistíu, el sombreru, los escoltes y lo que Felipe dio al noviu cuando-y cortaron la corbata a cachinos.

Non lo sabemos porque nun tomen cuenta; non yos importa. La boda pagámosla nosotros, los súbditos, que para eso tamos.

En compensación por esi favor hai quien diz que Felipe y Letizia van dir a la fuelga del 14 d’avientu. Eso sí, vistíos de forma discreta pa pasar desapercibíos y que naide los reconoza.