El Prestige de la Xusticia

Milio Mariño

Diez años dempués de que'l petroleru Prestige fuere a pique frente a la Costa da Morte, con 77.000 tonelaes de fuel a bordu, empecipiase na Audiencia d'A Coruña un xuiciu poles consecuencies de la catástrofe nel que'l principal acusáu ye Apostolos Mangouras, el capitán griegu del petroleru con bandera de les Bahames, dueñu liberianu, armador griegu, mutua británica, certificáu estadounidense y fletáu por una sociedá suiza, qu’enllordió de chapapote 1.600 kilómetros de mariña: dende la desaguada del Miñu hasta la Bretaña francesa.

Diez años dempués, que casi paecen un sieglu, tou un dubiello de países compañíes ya intereses van dir pasando pol xulgáu, a lo llargo de siete meses, pa determinar quién o quiénes fueron los culpables de la catástrofe.

Como resumen cuadren munchos refranes: A bones hores mangues verdes, munchu ruíu y poques nueces… O, ente toos la mataron y ella sola se morrió. Dígolo porque barrunto que la culpa, tola culpa, va recayer sobre capitán del barcu, que tien 77 años, y los otros mandos del petroleru, dexando llibre de toa responsabilidá a les compañíes, los países y les autoridaes. Nesti casu, Álvarez Cascos, Mariano Rajoy y el Gobiernu d'Aznar.