Al Rei dan-y ganes de llorar

Milio Mariño

Dende la India velo meyor pero cuando ta equí, al Rei, dan-y ganes de llorar. Non m’estraña, equí lleva un añu chungu y ellí enteróse que los xulgaos de Madrid rechazaron dos demandes de paternidá presentaes por un home y una muyer que dicen ser fíos suyos y presenten prebes d’ADN que certifiquen que son hermanos al 91% de probabilidaes.

Los xulgaos rechazaron les demandes alegando la inviolabilidá que la Constitución otorga al Rei d’España. Una involabilidá que cuesta entender que tamién s’aplique a les actividaes privaes o de familia. Eso afiten los demandantes que piensen siguir pleitiando y llegar a Estrasburgo si fai falta.

El tema tien so meigollu. Non solu pol escándalo que supondríen dos fíos de biri-biri sinón porque si, el güei ciudadanu, Albert Sola fuere reconocíu, polos tribunales, como fíu biolóxicu del Rei, al ser mayor que’l príncipe Felipe, correspondería-y a él, ser el socesor de Xuan Carlos.

Menuda papeleta. España y la Monarquía, vistes dende la India igual tienen un pase pero dende equí dientro alcuerden el cuentu aquel que dicía: Una vieya y un vieyu van p’Albacete, van p’Albacete…