El 14 d’avientu, más qu'un paru llaboral, debería ser una respuesta social

Milio Mariño

Nel desendolque d'esta crisis, los Sindicatos tán cumpliendo una función de representación social que nun puen, nun saben, o nun tán dispuestos a cumplir los partíos políticos. D'ehí que plantegen que la fuelga xeneral convocada pal 14 d’avientu sía daqué más qu'un paru llaboral.

La fuelga del 14, nun entamu, enmárcase dientro de la xornada de protesta convocada esta selmana pola Confederación Europea de Sindicatos pero, anque va suponer un finxu na hestoria del movimientu sindical, nun se va estender, como sería'l deséu de los llíderes sindicales de los países más afectaos, a tolos trabayadores de la Unión Europea.

Van tar España, Portugal y Grecia. Ye, ensin dulda, un primer pasu. Lo deseable, pa que los políticos y los oligarques financieros, tomen nota y nun escaezan que'l poder arrequexa y bilta del pueblu, sería que tuviera Europa entera.

El llamamientu que faen los Sindicatos inclúi que se pare tola actividá económica, que'l conxuntu de la población participe dafechu y la fuelga sía d'actividá llaboral pero tamién de consumu.

Toos deberíemos collaborar, na midía de les nueses posibilidaes, pa que sía un ésitu.