L’empresariu que convidaba a dormir la siesta.

Milio Mariño

Pa sos señoríes, los xueces de l'Audiencia Provincial de Madrid, qu'un farmacéuticu bese nos llabios de forma furtiva, afalague les nalgues, escriba cartes espresando'l so deséu sexual y proponga a una de les sos emplegaes dir a la cama d'un hotel, pa echar un pigazu, nun tien de considerase acosu sexual.

D’entamu paezlo pero igual non lu ye. Siempre pensamos mal. Como nun tamos avezaos a que los empresarios nos traten bien, a que nos conviden a echar un pigazu y nos dean besos, anque sía de forma furtiva, estrañanos qué daquién se porte asina.

Ye la falta costume. Ye l’aquello de que los empresarios d’esti país, polo xeneral, nun avecen a dar nin los bonos díes.

Por eso que l'Audiencia de Madrid, mirando por nós, y por qué supla l’exemplu, nun condergó a esti empresariu, como pretendía la emplegada desagradecía.

D’esta salió bien, agora de lo que nun se salva ye de la condena de la CEOE. La CEOE seguro que lo condena porque eso de convidar a los emplegaos a dormir la siesta... Y enriba en tiempos de crisis…

¿Qué van dicir n'Alemaña… Y nel FMI… Y en cualquier sitiu decente? Dirán qu’esti puntu ye un impresentable. Y, a fe que lleven razón, anque los xueces de Madrid digan lo que dieron en dicir.