Lo d’Amancio Ortega nun ye caridá, ye otru inventu del TBO

Milio Mariño

Nunca entendí que fuere caridá dar lo que sobra. Y yá nun vos cuento si la caridá vien acompañada d’aquella frase que toos oyimos más d’una vez. Aquello de: Enantes de tiralo, meyor dá-ylo a los probes.

Tampoco ye caridá, nin trigu llimpiu, nin exemplu de nada, lo qu'acaba de facer Amancio Ortega, que dio 20 millones a Cáritas, parte de lo que-y sobra, y sigue faciéndose, entovía, más ricu en base a pagar sueldos de 178 euros al mes por 65 hores selmanales de trabayu.

Pero eso nun importa. Nun importa como lo gane, nin lo que pague a los trabayadores o si fai trabayar a los nenos, importa que los señores tengan esos xestos porque perhí ye por onde nos quier llevar el PP.

Fora l'asistencia social, fora la llei de dependencia, el paru, los subsidios y cualquier derechu ciudadanu que suponga obligación del Gobiernu. Vénganos a esti reinu la caridá cristiana de siempre. Machete a los drechos y les instituciones democrátiques, lo qu'haya que facer que lo faigan Carites y les Monxines. Bonu y tamién les señorones colo que saquen d'esos Rastriellos que-yos permiten desocupar el trasteru.