La bombiélla de Báñez

Milio Mariño

Ye imposible: nun pue ser tan fata. O, quien sabe, igual si, porque cualquier persona con un plizcu de xaciu, por muncho que-y dixeren que s’antroxare de bruxa y aprovechare que tamos en Halloween pa distrayer al personal con un chiste prietu y peor, muncho peor, qu’aquellos de biltos verdes que cuntaba Zapatero, tendría un mínimu de vergoña y negaríase a facer el tontu.

Nun pue ser q’unu de ca cuatro trabayadores te nel paru, en total 5,7 millones, que’l comerciu nun vienda un chavu, que naide, -incluyíu'l Gobiernu- s’enfote en que l'añu que bien va xorrecer el PIB, que los analistes barrunten que los paraos, a la fin de 2013, sedrán 6,3 millones de persones… 

Y que con tola montonera de datos, cifres, estudios y opiniones, a la ministra d’Empléu Fátima Báñez se-y prenda la bombiélla y diga, ensin despeinase, que yá ta viendo señales de que la crisis escampa. Y, pa más aquello, diz que nun se refier a un optimismu vacíu, sinón al rellatu de la realidá.

La señora Báñez mialma ye una desgracia. Y non lo digo, como yá puen imaxinar porque seya fata. Dígolo porque ye Ministra.