El Congresu convertióse na tribuna del cinismu

Milio Mariño

Nes Cortes Xenerales, compuestes pol Congresu y el Senáu, atópase depositada la representación de la soberanía nacional. Pero, dase’l casu que diches instituciones tán siendo utilizaes pa una exhibición de cinismu y desfachatez que xustifica, con creces, que se convoque a los ciudadanos, un día sí y otru tamién, pa que les arrodien y esixan la dimisión del Gobiernu.

La Ministra de Trabayu y el Ministru de Facienda respondieron ayeri, nel Congresu y el Senáu, col silenciu d'una sorrisa cínica a la entruga de si'l Gobiernu piensa revalorizar les Pensiones, tal como establez la llei y el Pactu de Toledo.

Animaos seguramente por resultáu de Galicia, la cosa nun quedó ehí. Pa mayor escarniu, Montoro despachóse diciendo que los Presupuestos de 2013 son los más sociales de la democracia, mentanto que’l Ministru del Interior, la Delegada del Gobiernu y Esperanza Aguirre animaben a la policía a qu'actuara con mano dura pa reprimir les protestes.

Estos que se porten asina nun merecen representanos porque, mialma, nun representen a naide, nin a los sos votantes, que de xuru sedrán más sensatos y más prudentes qu'ellos.