Tirar piedres sedrá más delitu que tirar millones d'euros

Milio Mariño

Según el nuevu artículu, 557 bis, que recueye l'anteproyectu de reforma del Códigu Penal aprobáu ayeri nel Conseyu de Ministros, tirar piedres u otros oxetos contundentes nuna manifestación va poder ser castigáu con penes d'unu a seis años de cárcel.

El tipu básicu del delitu de desordes públicos camuda. Hasta agora, pa considerar que se cometiere infracción esixíase que se causaren mancadures a les persones, daños nes propiedaes, o que s'atrancaren les víes públiques o los sos accesos a les instalaciones y los edificios.

La reforma blinca percima de tou eso, nun tien en cuenta si hai mancadures o daños, el fechu de tirar piedres o invadir la vía pública, anque nun s'ataye'l tráficu, supón delitu.

Ye más, según dellos caderalgos de Derechu Penal, cola nueva redacción podríen castigase conductes agora non incluyíes, como encadenase o formar una cadena humana nuna manifestación.

Ta vistu que’l Gobiernu, cuando quier, trabaya. Sospriende lo rápido que reacciona contra los manifestantes y lo lento, hasta la galbana darréu, que s'amuesa cuando se trata de proponer reformes qu'afeuten a los que nos llevaron a la ruina. Si usté tira una piedra pueden caye-y seis años de cárcel pero si tira mil millones d'euros podrá siguir pasiando como sí nada.