Pa merecer un indultu hai que ser torturador o corruptu

Milio Mariño

David Reboredo ye natural de Vigo, tien 43 años, lleva 20 de drogadictu y foi condergáu a 7 de cárcel por pasar unes papelines -0,4 gramos d’heroína- fai d’ello 6 años.

La cosa foi que dempués d'intentalo enforma, David lleva tres años desengancháu de la droga y tien el sofitu d'unes cuantes asociaciones que respuenden de la so reinserción social. Con esi méritu, el de collaborar col Grupu Imán, que cuida de los seropositivos, y l'ayuda que-y vien emprestando al so padre, que ye ciegu, David creyó que tenía motivos pa presentar una petición d'indultu y evitar dir a la cárcel.

Nun debía tenelos porque’l Gobiernu negó-ylo. De mou qu'ayer, 5 d'avientu, a les 8 la tarde ingresó na prisión d'A Lama pa cumplir los 7 años de condena.

David nun ye un evasor qu'asitió dellos millones d'euros nun paraísu fiscal, nin propietariu d'un xalé metíu na mar, nin Xuez prevaricador, nin diputáu corruptu, nin Policía torturador. Ye un bon rapaz, un drogadictu rehabilitáu qu'ayuda a los seropositivos y al so padre ciegu. Y, como too hai que dicilo, tamién tien sos idees, va tiempu que milita en Nova Esquerda Socialista.

Él non lo sabía pero con esos antecedentes, pa esti Gobiernu, nun merez l'indultu. Nun ye lo bastante corruptu nin mala persona.