El Salariu Mínimu xube 3 euros al mes

Milio Mariño

Como, desque gobierna Rajoy, tiénennos avezaos a que nun haya vienres ensin regalu, ayeri, víspora del Gordu, el Gobiernu regalónos una xubida del salariu mínimu, del 0,6 %, que supón que dichu salariu va incrementase en 3 euros al mes.

De toles maneres, col aquello de que Díaz Ferrán y los sos colegues non lu tomen a mal, Rajoy entainó a dicir que la xubida nun va suponer una perda de competitividá de les nueses empreses pos va vese compensada polo que yá xubió l'iva, l'ibi, la lluz, el gas, el copagu en melecines, el copagu sanitariu y l'IPC, que van exercer d'elementu correutor y van facer que los 645,30 euros, de nuevu salariu mínimu, tengan un valor real que va tar alredor de los 580. Ye dicir per debaxo del salariu mínimu de Grecia que taba en 877 pero que col rescate obligáronlos a baxalo hasta los 588.

El Gobiernu destacó que si bien el nuesu salariu mínimu nun ye de los más altos d'Europa, (Luxemburgu y Alemaña tienen 1801 euros ya Holanda, Irlanda, Bélxica y Francia, 1462) superamos, de llargu, el de Bulgaria que ye de 138 euros.

Merez resaltase, tamién, el xestu de la ministra Fátima, que dixo que, anque la xubida supunxo un esfuerzu, nun espera que los sindicatos la aplaudan.