De lo prietu a lo blancu, lluchando

Milio Mariño

Toos alcordamos como España entera apoyó a los mineros pola xusticia de les sos reivindicaciones y la exemplaridá de les sos protestes, pero nun sé yo si la llucha de los médicos y los trabayadores de la sanidá, madrilanos, tá teniendo'l reconocimientu que merez. Nun sé si, realmente, somos conscientes de lo que, a toos, nos va nesti envite.

Los sanitarios madrilanos nun ponen barricaes, nin llancen voladores contra los antidisturbios, nin faen marches de 500 kilómetros. La so protesta ye, por dicilo de dalguna manera y ensin que se mal interprete, más civilizada y menos vistosa que la de los mineros, pero non menos importante en cuantu a lo que supón, pa ellos, de sacrificiu y pa nós que trunfen o salgan derrotaos.

Lo que plantega'l PP ye l'americanización de la sanidá. Esto ye, la estensión del modelu sanitariu estadounidense xestionáu poles compañíes financieres con enfotu d'enriquecimientu, que dio como resultáu un sistema sanitariu más caru, más ineficiente y más impopular.

La crisis, nesto, nun tien que ver. Equí lo que cunta ye que'l capital, los bancos y les compañíes de seguros, busquen nueves árees de negociu que nun sían especulatives y la Seguridá Social y los servicios públicos son valores seguros.

Non se m’ocurre qué nin cómo, pero creo que deberíamos facer dalgo p'apoyar la llucha de los sanitarios madrilanos.