La PePera aventurera y les firmes de Madrid

Milio Mariño

El día en que la Plataforma de Trabayadores y Usuarios en Defensa de la Sanidá Pública, presentó na Conseyería de Sanidá de Madrid 911.786 firmes, contra la privatización de los hospitales, Rafael Bengoa, el que fuere Conseyeru vascu de Sanidá con Patxi López, aceptó la propuesta de Barack Obama pa incorporase al so equipu y formar parte del grupu de trabayu que se va encargar d'implantar la reforma sanitaria n'Estaos Xuníos.

Rafael Bengoa siempre s'enfrentó a los retayos sanitarios y trató de facer ver qu'una sanidá pública, sostenible y de calidá, ye posible. Agora, tres la victoria del PNV n'Euskadi, marcha pa los Estaos Xuníos.

Rafael tien 60 años, pero seguru que pa Marina del Corral, secretaria xeneral d'Inmigración ya Emigración, del PP, la so marcha al estranxeru nun se debe a que nel País Vascu, y n'España, gobiernen dos partíos de dreches que comparten el mesmu criteriu no tocante a la sanidá pública, sinón a otros factores ente los que ta l'impulsu aventureru de la mocedá.

Foi lo que dixo ayer, la señora del Corral, que la emigración de les moces y mozos españoles al estranxeru nun ye pola crisis económica sinón por otros factores ente los que ta l'impulsu aventureru de la xuventú.