L’asturiano nel Currículum de toos.

Milio Mariño

Nun tengo por menos que descubrime ante un spot publicitariu: El Currículum de Todos. Asina ye como se llama la campaña de Campofrío que va empezar a emitise'l 24 d'avientu, y na que, per aciu d’un videu que dura 160 segundos, destáquense cuestiones como la solidaridá, el trabayu n'equipu, la valentía o la creatividá, valores que van apurriendo cómicos, cantantes y xente conocío, mientres suena una versión de Suspiros de España.

Toes eses aportaciones ye como si les ficieren les ames de casa, los trabayadores, les families, pensionistes, xente mozu… Que van indicando a Fofito lo que tien que poner como Currículum d'España, pa unvialo a los llíderes políticos internacionales, los organismos económicos y les axencies de calificación de riesgu.

Iciar Bollain, la direutora del spot, esmeróse pa poner en valor el corazón de les persones, pa tocanos la fibra sensible y danos ánimos, cuando los que gobiernen nos desprecien y, mialma, nos traten como a súbditos de la Edá Media.

Con ser eso preciosu, Iciar fainos otru regalu impagable, el de que Chus Lampreave llame l'atención de los presentes pa diciyos qu'amás de les llingües reconocíes, Euskera, Catalán y Gallego, tamién hai que poner el Bable.

Daveres merez la pena. Barrunto que va ser un éxitu. Si nun queréis esperar hasta'l 24, podéis velo en youtube.