Gallardón el repartidor de dolor

Milio Mariño

Tomalo por una estratexa sedría sobrevaloralos, nun creo que lleguen a tantu n’intelixencia nin perversión, pero lo ciertu ye que la riestra conflictos que ploniaron al empar fai qu'unos se tapen a otros y nun sepamos cuál merez más refugo, si la xusticia pa ricos, la privatización de la sanidá, el desastre de la llei d'educación, l'abandonu de les persones dependientes, la non revalorización de les pensiones, l'escarniu de les hipoteques, los indultos a los torturadores, la escandalosa subvención a FAES y lo que te rondaré morena porque podríamos enllenar una páxina con canallaes y decisiones dictatoriales.

Lo curiosu ye que si les decisiones del Gobiernu anden a la tema no tocante al perxuiciu que suponen pa nos, los Ministros paez que s'inscribieron nuna carrera por ver quién resulta más antipáticu.

Ún de los campeones, quien lo diría va unos años, ye Gallardón qu'amás d'autoritariu y bocayón ye ruino y remanador. Y mal perdedor porque cuando se vio perdíu echó mano de la paga extra de los xueces pa descalificar la protesta sobre les tases de la xusticia y acabó endolcándolo tou nuna frase: Gobernar ye, a veces, repartir dolor.

Dalgunos mialma pensábemos que gobernar yera procurar el bienestar de los ciudadanos pero Gallardón dexó claro que nin él, nin el Gobiernu del PP, lo entienden asina.