A María Teresa, conózola personalmente. Esclario. María Teresa vive, o vivía, mui cerca del hotel onde m’agospiaba en Madrid. D’aquella pasaba en Madrid diez o quince díes al mes y cuando, peles mañanes, diba a mercar el periódicu, téngome atopáu con ella que se yo la de veces. Si, si, lleístis bien, mercaba’l periódicu nel mesmu quioscu que yo. Salía caminando de casa, mercaba'l periódicu, pagábalo y depués xubía al coche oficial.
Confieso que munches vegaes tuvi tentáu de felicitala, d'estima-y el so trabayu como vicepresidenta y, anque pa estes coses nun suelo ser cobarde, nunca m'atreví.
El casu que va unos díes, cuando la vi nuna semeya, col so nuevu look, quedé un pocu deceicionáu.
Teníala en gran estima. Paecíame una persona honesta, integra, trabayadora… Y, amás aquel xestu de dir ella a mercar el periódicu yera como la confirmación.
Nun sé si tengo motivos pa la deceición. Seguramente que non, que facer la ciruxía estética nun debe afeutar pa nada a los valores d’una persona pero ye una reflexón que me pruye compartir con vosotros. Y prestaríame que me diereis el vuestru paecer.
No hay comentarios:
Publicar un comentario
Milio Mariño