El mundu acabase, nun ye broma

Milio Mariño

Mialma tomaba a chancia lo que dicíen del fin del mundu. Paecíame una fatada hasta que lleí que la catástrofe que predicíen los Mayas nun tenía por qué ser al estilu del apocalipsis que diz la ilesia, sinón que podía tratase d'una debacle social y económica qu’acabare con too.

Ehí yá torcí'l focicu y me punxi seriu. Yá entamé a buscar referencies. Nun tuvi que buscar muncho, enaína di col comunicáu qu'ayer fixeron públicu, el Gobiernu de los Estaos Xuníos y la NASA.

El Gobiernu americanu esclaria, nel so blog oficial, que los rumores sobre'l fin del mundu, d’equí a unos díes, son falsos. Diz que lo previstu pol calendariu Maya nun va asoceder. Que nun se producirá'l choque catastróficu d'una cometa contra la tierra, nin tampoco que dengún planeta ocultu, que yera otra de les posibilidaes, va topetar contra nós.

El Comunicáu conclúi cola siguiente frase: "El mundu nun va acabase’l 21 d'avientu, nin dengún otru día de 2012".

Yera lo que me faltaba. Agora sí que lo creo. Hasta los americanos ponen en dulda qu'esti tingláu vaya siguir funcionando en xineru. De mou qu'en cuantu acabe d’escribir esto voi colar pal caxeru y tomar pol sacu la carga lleña… A vivir, que son 13 díes.