Los suicidios y l’obispu de Segovia

Milio Mariño

Ángel Rubio, que ye obispu de Segovia, dixo ayer que nun cree qu'esista rellación ente los suicidios y los desahucios. Entiende que son casos murnios y doliosos pero diz qu'esa causa-efeutu ye un inventu de los periodistes. Que la verdadera causa ye la crisis de valores espirituales que traviesa España. Almite que los desahucios ponen a muncha xente en dificultaes pero, ante eses situaciones, la postura de la Ilesia decatase por proponer más caridá p'atender a les persones necesitaes.

La opinión del obispu ye d'un cinismu que plasma. Echa-yos la culpa a les víctimes y propón la caridá como remedio de la inxusticia.

La caridá, obispu facha, nun soluciona nada. Ye más, cuando-y unvie esti casu, qu'asocedíu en Florida, el pasáu 6 d'avientu, toi convencíu de que va dame la razón.

Los principales periódicos d'Estaos Xuníos publicaron, va unos díes, qu'una muyer de 39 años, llamada Gretchen Molanne, suicidóse na so casa de Spring Hill, según cuntaron los familiares a la policía, porque nun soportaba los munchos orgasmos que tenía a diariu, Al paecer sufría un trestornu xenital que la llevaba a tener hasta 50 orgasmos nun día.

Seguru qu'en Spring Hill habría, y habrá, munches almes caritatives dispuestes a socorrer a la difunta señora pero, como tará d’alcuerdo'l señor obispo, la caridá non solu nun solucionó'l problema sinón qu'agravólo más.