Dellos tenéisme dicho que vos cuesta entender lo qu'escribo y más entovía que tenga la zuna d’escribir n’asturianu. Sé que lo dicís pol mio bien… Pero, sobre too, pol vuestru, porque col aquello de dicime que si escribiera en castellanu diba tener más lleutores, vosotros debáis tener menos trabayu en lleer lo qu’escribo.
Lleer nunca foi fácil, requier un esfuerciu. Y lleer n’asturianu más esfuerciu entovía.
Dicho esto, si dalguién quier llegar a conclusiones polítiques o nacionaliegues pue facelo si-y apetez pero taría enquivocáu. Pa min, escribir n’asturianu nun ye un compromisu políticu, ye la manera que tengo d'espresame meyor, de ser más anténticu. Ye un compromisu comigo mesmu. Ye sentime asturianu.
D'ehí que piense siguir escribiendo, siempre que puea, una parzamica diaria y colgándola nesta ventanina.
Tamién espero siguir cuntando cola vuestra amistá, siguir siendo un amigu vuestru. Non el primeru, nin el segundo o’l terceru, confórmome con ser unu.
Un abrazu mui fuerte y muncha salú y suerte.
No hay comentarios:
Publicar un comentario
Milio Mariño